لاہور: داتا دربار کے قریب نالے میں گرنے والی خاتون کی لاش مل گئی، بچی کی تلاش جاری
لاہور: (دنیا نیوز) ڈی آئی جی آپریشن لاہور نے تصدیق کی ہے کہ نالے میں گرنے والی خاتون کی ڈیڈ باڈی مل گئی ہے جبکہ بچی تاحال لاپتہ ہے جس کی تلاش کیلئے ریسکیو آپریشن جاری ہے۔
داتا دربار کے قریب ماں اور بیٹی کے مین ہول میں گرنے کا معاملے پر ڈی آئی جی آپریشن فیصل کامران نے میڈیا سے گفتگو کرتے ہوئے کہا کہ یہ بدقسمت واقعہ رپورٹ ہوا اور 1122 کو کال آئی، اس کال کو دیکھ کر تمام تر واقعے کہ تحقیق کی گئیں۔
انہوں نے کہا کہ خاتون کی لاش ملنے کے بعد تمام ادارے اس وقت بچی کو ڈھونڈنے کیلئے مل کر کام کر رہے ہیں، جس نے اس معاملے میں غفلت برتی تھی اس کی انکوائری کیلئے کمیٹی بنا دی گئی ہے، کچھ افسران کو نا اہلی کے باعث معطل کر دیا ہے، آؤٹ فال روڈ سے خاتون کی نعش ملی۔
فیصل کامران نے مزید بتایا کہ سی سی ٹی وی فوٹیج سے خاتون کے شوہر کی ایک، ایک بات سچ ثابت ہوئی، یہ لوگ داتا دربار سے سلام کرکے نکلے تھے کہ حادثہ پیش آگیا، سیف سٹی نے تمام چیزیں نکال لی ہیں۔
خاتون کی لاش ملنے سے قبل ریسکیو ذرائع کا کہنا تھا کہ جس سیوریج ہول میں 2 افراد گرنے کا دعویٰ کیا گیا ہے اس میں کسی انسان کا ڈوبنا تکنیکی طور پر ممکن ہی نہیں، جس مقام کی نشان دہی کی گئی ہے وہ داتا دربار کے قریب پرندہ مارکیٹ میں ہے، انتظامیہ نے اس جگہ کھدائی کر رکھی تھی۔
ریسکیو ذرائع نے بتایا کہ واقعے کے وقت اس علاقے میں اندھیرا تھا، ریسکیو 1122 کی سپیشلائزڈ ٹیمیں اور غوطہ خور صرف چند منٹوں میں جائے وقوع پر پہنچ گئے، جبکہ لاہور انتظامیہ کا کہنا تھا کہ سیوریج لائن کا معائنہ کیا، معلوم ہوا کہ وہاں کوئی حادثہ پیش نہیں آیا۔
اس دوران لاپتہ خاتون کے والد نے پولیس کو بیان دیا تھا کہ اس کی بیٹی کو قتل کیا گیا ہے، اس بیان کے بعد پولیس نے خاتون کے شوہر سمیت 3 افراد کو گرفتار کر لیا جنہیں بعد میں رہا کر دیا گیا۔
