پاکستان میں ساؤتھ ایشین گیمز کی میزبانی خطرے میں پڑگئی
لاہور(اسپورٹس ڈیسک)پاکستان میں ساؤتھ ایشین گیمز کی میزبانی خطرے میں پڑگئی ، مارچ 2024 میں ہونے والے گیمز کی میزبانی سری لنکا کو دئیے جانے کا امکان ہے ۔14 ویں ساؤتھ ایشین گیمز اگلے برس مارچ میں ہونے ہیں۔۔
اور پاکستان کو ان گیمز کی میزبانی 2019 میں دی گئی تھی،پہلے یہ گیمز 2021 میں ہونے تھے لیکن کورونا کی وجہ سے پھر اسے 2024 میں کرانے کی اجازت مل گئی۔پاکستان اولمپک ایسوسی ایشن اور وزارت بین الصوبائی رابطہ کے درمیان گیمز کے فنڈز کے حوالے سے تاحال معاملات طے نہ ہوسکے ۔ پی او اے نے کہا کہ کئی بار حکومت کو گیمز کیلئے فنڈز فراہمی کے خطوط لکھے لیکن کوئی جواب نہیں ملا۔ دوسری جانب بھارت بھی پاکستان کے بجائے سری لنکا کو میزبانی دلوانے کیلئے سامنے آگیا ،رپورٹ کے مطابق سری لنکن وزیر کھیل نے گیمز کی میزبانی کیلئے اپنی فیڈریشن کو تیاری کرنے کی ہدایت بھی جاری کردی ہے ۔
