نسیم کے بعد شاہین، رضوان، بابر کو بھی این او سی نہیں ملے گا
لاہور(سپورٹس ڈیسک )پی سی بی فرنچائز ٹورنامنٹس کیلئے کئی اہم کھلاڑیوں کے این او سی روکنے پر غور کررہا ہے ۔
کرک انفو کی رپورٹ کے مطابق پی سی بی فاسٹ بولر نسیم شاہ کے بعد شاہین شاہ آفریدی، محمد رضوان، اور بابراعظم کو فرنچائز لیگز کیلئے این او سی جاری نہیں کرے گا۔ دی ہنڈریڈ کیلئے نسیم شاہ کی جانب سے بورڈ سے این او سی کی درخواست کی گئی تھی جسے پاکستان کرکٹ بورڈ نے یکسر مسترد کردیا تھا۔این او سی نہ ملنے کی صورت میں شاہین شاہ آفریدی، محمد رضوان، اور بابراعظم بھی گلوبل ٹی20 لیگ میں شرکت سے محروم رہ سکتے ہیں جبکہ یہ لیگ آئی سی سی سے بھی منظور شدہ نہیں ہے ۔بورڈ نے تینوں فارمیٹ کھیلنے والے قومی کرکٹرز کیلئے دیگر لیگز میں این او سی محدود کرنے کا فیصلہ کیا ہے ، جس کامقصد کھلاڑیوں کو انجریز اور تھکاوٹ سے محفوظ رکھا جاسکے ۔آل فارمیٹ پلیئرز کیلئے پالیسی چیئرمین محسن نقوی، ہیڈ کوچز اور شعبہ انٹرنیشنل کی میٹنگ میں طے کی گئی، رواں سال تینوں فارمیٹ کھیلنے والے قومی کرکٹرز کو لیگز کے لیے این او سی نہ دیے جانے کا امکان ہے کیونکہ اگلے برس مئی تک لگاتار کرکٹ کھیلنی ہے ۔
