آسٹریلیا میں ایک میچ بھی جیت گئے تو بڑی کامیابی :وسیم اکرم
میلبرن (سپورٹس ڈیسک )قومی کرکٹ ٹیم کے سابق کپتان وسیم اکرم نے کہاہے کہ آسٹریلیا میں کنڈیشنز مشکل ہوتی ہیں، پاکستان کی یہاں سیریز آسان نہیں ہو گی، یہاں ایک بھی ون ڈے جیت جاتے ہیں تو یہ بہت بڑی کامیابی ہو گی جبکہ ٹی ٹونٹی سیریز اچھی ہو گی۔
میلبرن میں آن لائن پریس کانفرنس کے دوران انہوں نے کہا کہ چیمپئنز ٹرافی کے لیے بھارت سے اچھے اشارے مل رہے ہیں، پاکستان کرکٹ بورڈ نے بھارتی بورڈ کو کئی آفرز کی ہیں، بھارت کو پاکستان آنا چاہیے ۔ ویرات کوہلی، ہاردک پانڈیا اور سوریا کمار یادیو کے پاکستان میں بہت مداح ہیں، میں سمجھتا ہوں کہ دونوں ممالک کے لوگوں کا آپس میں رابطہ ہونا چاہیے ، بھارت اس بارے میں سوچے ۔ میں 6، 7 سال سے بھارت نہیں گیا، میں وہاں کے کھانے اور لوگوں کو مِس کرتا ہوں، بھارتی کھلاڑی پاکستان آئے تو انجوائے کرینگے ، فخر زمان امپیکٹ پلیئر ہیں، مجھے یقین ہے کہ سوشل میڈیا بیان فخر نے نہیں لکھا، جس نے بھی لکھا ہے اسے بتانا چاہیے تھا کہ سینٹرل کنٹریکٹ کی وجہ سے آپ کو مسئلہ ہو سکتا ہے ۔ میں سمجھتا ہوں کہ یہ فخر زمان کے لیے ایک سبق ہے ، سوچ سمجھ کر سوشل میڈیا پر لکھنا چاہیے ، پی سی بی کا اس معاملے پر اپ سیٹ ہونا بنتا تھا۔ محسن نقوی کرکٹ کے لیے بہت اچھا کام کر رہے ہیں، مجھے جاب کی آفر ہوئی لیکن میں 9 سے 5 جاب کرنے والا بندہ نہیں ہوں۔ محمد رضوان کو کپتانی کا تجربہ ہے ، وہ اچھی چوائس ہیں، وہ بس کھیل پر فوکس کریں۔ہوم ایڈوانٹیج کے لیے پچز بنانے پر تنقید کرنے والوں کے حوالے سے وسیم اکرم نے کہا کہ ہمیں دشمنوں کی ضرورت نہیں، ہم خود ہی بہت ہیں، ہوم ایڈوانٹیج پر تنقید سمجھ سے باہر ہے ۔
