پی ایس ایل 10 : لاہور قلندرز کا کِٹ ڈیزائن مقابلے کا اعلان
لاہور(سپورٹس ڈیسک ) پاکستان سپر لیگ ( پی ایس ایل ) کی فرنچائز لاہور قلندرز نے پی ایس ایل کے دسویں ایڈیشن کیلئے کِٹ ڈیزائن کے مقابلے کا اعلان کر دیا۔
لاہور قلندرز کے سی ای او عاطف رانا، سی اواو ثمین رانا نے عالمی شہرت یافتہ ڈیزائنر محمود بھٹی کے ساتھ پریس کانفرنس کرتے ہوئے کہاکہ کِٹ ڈیزائن کے مقابلے میں نوجوان ڈیزائنرز اور مداحوں کو مدعو کیا گیا ہے ۔ یہ صرف ڈیزائن کا مقابلہ نہیں بلکہ اس مقابلے کا مقصد نوجوانوں کی تخلیقی صلاحیتوں کو سامنے لانا ہے ، مقابلے سے لاہور قلندرز اور اس کے پرجوش مداحوں کے درمیان رشتہ مزید مضبوط ہو گا۔ لاہور قلندرز نے ہمیشہ جدت کو اہمیت دی ہے ، کِٹ مقابلے کے لیے فیشن سکولوں سے تعلق رکھنے والوں کی حوصلہ افزائی کی جائے گی جبکہ مقابلے میں حصہ لینے والوں سے درخواست ہے کہ وہ 100 فیصد اصل ڈیزائن پیش کریں۔ مقابلے کے نگران معروف پاکستانی نژاد فرانسیسی ڈیزائنر محمود بھٹی ہونگے ، محمود بھٹی بہترین ڈیزائنر کے انتخاب میں مدد کریں گے ، منتخب کردہ ڈیزائنر عوامی ووٹ کے لیے پیش کیے جائیں گے ، کِٹ مقابلہ جیتنے والے کو خصوصی انعام اور پی ایس ایل ڈگ آؤٹ میں بیٹھنے کا موقع ملے گا، کِٹ ڈیزائن جمع کرانے کی آخری تاریخ 25 مارچ سہ پہر 4 بجے تک ہے ۔دوسری جانب سربراہ جیوری محمود بھٹی نے کہا کہ نواجوان ٹیلنٹ کی رہنمائی اور مدد کرنا میرے لیے اعزاز کی بات ہے ، میں مقابلے میں حصہ لینے والے شرکاء کے وژن کو دیکھنے کیلئے بے تاب ہوں۔
