چوتھا ٹی ٹونٹی ، قومی بیٹنگ لائن ریت کی دیوار ثابت : نیوزی لینڈ کو سیریز میں برتری
آکلینڈ(سپورٹس ڈیسک)چوتھے ٹی ٹونٹی میں کیویز نے 115 رنز سے پاکستان کو شکست دے کر پانچ میچز کی سیریز میں 3-1کی فیصلہ کن برتری حاصل کرلی۔
ماؤنٹ مانگا نوئی میں کھیلے گئے میچ میں پاکستان کے کپتان سلمان علی آغا نے ٹاس جیت کر پہلے نیوزی لینڈ کو بیٹنگ کی دعوت دی۔پہلی اننگز میں کیوی بیٹرز نے جارحانہ کھیل کا مظاہرہ کیا، میزبان ٹیم نے 3.5 اوورز میں ہی 50 رنز بنالیے تھے ۔نیوزی لینڈ کی ٹیم نے مقررہ 20 اوورز میں 6 وکٹوں کے نقصان پر 220 رنز سکور کیے ۔پاکستان کی جانب سے حارث رؤف نے 3، ابرار احمد نے 2 اور عباس آفریدی نے 1 کھلاڑی کو آؤٹ کیا۔ہدف کے تعاقب میں پاکستان کی پوری ٹیم 16.2 اوورز میں 105 رنز پر آؤٹ ہوگئی۔ ۔ محمد حارث نے 2، حسن نواز، سلمان علی آغا اور شاداب خان ایک ایک رن بناکر پویلین لوٹے ، عرفان خان 24 رنز بناکر ہمت ہارگئے ، خوشدل شاہ صرف 6 رنز بناسکے اور عباس آفریدی بھی ایک رن بناکر آؤٹ ہوگئے ۔پاکستان کی جانب سے عبدالصمد 44 رنز بناکر نمایاں رہے جب کہ شاہین شاہ آفریدی اور حارث رؤف نے 6،6 رنز بنائے ۔نو کھلاڑی ڈبل فگرز میں ہی داخل نہیں ہوسکے ۔نیوزی لینڈ کی جانب سے جیکب ڈفی نے 4، زکرے فولکس نے 3جب کہ ول اورورکی، ایش سوڈھی اور جیمز نیشم نے نے ایک ایک وکٹ حاصل کی۔ نیوزی لینڈ نے پہلے دو میچز میں پاکستان کو شکست دی تھی جب کہ تیسرے میچ میں پاکستان نے نیوزی لینڈ کو 9 وکٹوں سے شکست دی۔
