پی ایس ایل:بنگلہ دیشی کھلاڑیوں کو این او سی جاری کردیاگیا
لاہور(سپورٹس ڈیسک )پاکستان سپر لیگ (پی ایس ایل) کے 10ویں ایڈیشن میں شریک بنگلہ دیشی کرکٹرز کو این او سی جاری کردیا گیا۔
میڈیا رپورٹس کے مطابق بنگلہ دیش کرکٹ بورڈ (بی سی بی) لٹن داس، ناہید رانا اور رشاد حسین کو پاکستان سپر لیگ (پی ایس ایل) کے 10ویں ایڈیشن کیلئے نو آبجیکشن سرٹیفکیٹ (این او سی) دینے کی آمادگی ظاہر کردی ہے ۔وکٹ کیپر بیٹر لٹن داس کو کراچی کنگز نے منتخب کیا جبکہ لیگ اسپنر رشاد حسین اور فاسٹ بولر ناہید رانا کو 13 جنوری کو ہونے والے پی ایس ایل پلیئرز ڈرافٹ میں بالترتیب لاہور قلندرز اور پشاور زلمی نے اپنے سکواڈ کا حصہ بنایا ہے ۔بنگلہ دیش کرکٹ بورڈ کے کرکٹ آپریشن انچارج شہریار نفیس نے کہاہے کہ بورڈ کھلاڑیوں کو این او سیز دینے کیلئے پُرعزم ہے لیکن پلئیرز کے ورک لوڈمینجمنٹ کو مدنظر رکھا جائے گا۔دوسری طرف زمبابوے کی ٹیم 15 اپریل کو بنگلہ دیش پہنچ رہی ہے ، پہلا ٹیسٹ 20 اپریل سے سلہٹ جبکہ دوسرا 28 اپریل سے چٹاگانگ میں کھیلا جائے گا تاہم اس سکواڈ میں رشاد حسین کا نام شامل نہیں ہے ۔
