علی ترین کی پی سی بی اور پی ایس ایل مینجمنٹ پر شدید تنقید
لاہور(سپورٹس ڈیسک )پی ایس ایل کی سابق چیمپئن ٹیم ملتان سلطانز کے مالک علی ترین نے پی سی بی اور پی ایس ایل مینجمنٹ کو شدید تنقید کا نشانہ بناتے ہوئے کہا ۔۔
کہ لیگ کی تمام فرنچائزز فی الحال ایک "رینٹل ماڈل" پر چل رہی ہیں ، جس میں ٹیموں کے مالکان کو حقیقی ملکیت حاصل نہیں۔ایک انٹرویو میں انہوں نے کہا کہ ہم ہر سال فرنچائز اونرز ٹیموں کو اپنے پاس رکھنے کیلئے رینٹ (یعنی کرایہ ) ادا کرتے ہیں، اگر نہ دیں تو ہمیں کوئی مالکانہ حقوق حاصل نہیں ہیں جبکہ انڈین پریمیئر لیگ (آئی پی ایل) کی طرح غیر ملکی سرمایہ کاری کے مواقع بھی موجود نہیں، پی سی بی نے پی ایس ایل کے 11ویں ایڈیشن کیلئے 8 ٹیموں کا کوئی واضح منصوبہ تاحال پیش نہیں کیا، اسی طرح اگر ریونیو شیئرنگ کا معاملہ ہوگا تو صورتحال عجیب ہوجائے گی، آئی پی ایل مالکان اپنی ٹیمیں کسی کو بھی فروخت کرسکتے ہیں، البتہ بورڈ یہ دیکھتا ہے کہ اسکے پاس کتنا پیسہ اور کس طرح ٹیم لیکر چل سکتا ہے لیکن ہمارے پاس ایسا اختیار ہی نہیں ہے ۔ پی ایس ایل کی موجودہ مینجمنٹ غیر سنجیدہ ہے ، ہمیں اپنی ٹیموں پر کوئی طویل المدتی کنٹرول نہیں دیا جارہا ہے ، نئی ٹیموں کے اضافے سے پہلے واضح پالیسی کی ضرورت ہے ، ورنہ لیگ کا مستقبل خطرے میں پڑ جائے گا۔
