سٹیڈیم سے نام ہٹانے کا معاملہ،اظہر الدین عدالت جائینگے
ممبئی(سپورٹس ڈیسک)حیدرآباد کرکٹ ایسوسی ایشن نے سابق بھارتی کپتان محمد اظہر الدین کا نام سٹینڈ سے ہٹانے کا فیصلہ کرلیا۔
میڈیا رپورٹس کے مطابق یہ اقدام لارڈز کرکٹ کلب کی جانب سے دائر کی گئی شکایت کے بعد کیا گیا، جس میں \'مفاد کے تصادم\' کا الزام لگایا گیا تھا۔اظہر الدین سٹینڈ کا نام اپال سٹیڈیم کے نارتھ سٹینڈ میں 2019 میں وی وی ایس لکشمن سے بدلا گیا تھا۔یہ اقدام اسوقت اُٹھایا گیا تھا جب محمد اظہر الدین حیدرآباد کرکٹ ایسوسی ایشن کے صدر تھے ، جس کے بعد فروری 2024 میں لارڈز کرکٹ کلب نے شکایت دائر کی گئی تھی۔لارڈز کرکٹ کلب کے مطابق قانون کے تحت ایپیکس کونسل کا رکن اپنے فائدے کیلئے یکطرفہ فیصلہ نہیں لے سکتا۔سٹینڈ سے نام ہٹانے کے معاملے پر سابق کپتان کا کہنا ہے کہ یہ مفادات کا ٹکراؤ نہیں ہے ، میں اس پر تبصرہ کرکے اس سطح تک نہیں گرنا چاہتا۔انہوں نے کہا کہ 17 سال کی کرکٹ خدمات اور 10 سال کی کپتانی کے بعد حیدر آباد کرکٹ ایسوسی ایشن کے اس سلوک پر بہت دُکھ ہے ، ہم اس معاملے پر 100 فیصد عدالت جائیں اور قانونی راستہ اختیار کریں گے ۔دوسری جانب لارڈز کرکٹ کلب نے مؤقف اپنایا ہے کہ یہ فیصلہ شفافیت اور سالمیت کے ہمارے عزم کو تقویت دیتا ہے ۔
