ایک دن ضرور پاکستان کیلئے کھیلوں گا:محمد نعیم
لاہور(سپورٹس ڈیسک)سپر لیگ فرنچائز لاہور قلندرز کے ٹاپ آرڈر بیٹر محمد نعیم کا کہنا ہے کہ پاکستان کی گرین شرٹ مقدر سے ملتی ہے ۔۔
اس کے حصول کے لیے محنت اور پرفارم کرتا رہوں گا اور ایک دن ضرور پاکستان کے لیے کھیلوں گا۔محمد نعیم نے کہا کہ پی ایس ایل میں سب سے بری پرفارمنس میری جا رہی تھی لیکن مجھے لاہور قلندرز نے بہت سپورٹ کیا اور اعتماد کی وجہ سے بار بار فلاپ ہونے کے بعد ففٹی کرنے میں کامیاب ہوا۔محمد نعیم نے کہا کہ لاہور قلندر کا مجھ پر اعتماد کرنے کے لیے ان کا مشکور ہوں، لاہور قلندرز نے صرف اس پی ایس ایل میں اعتماد نہیں کیا بلکہ یہ سلسلہ چھ سات برس پرانا ہے ، پلیئرز ڈویلپمنٹ پروگرام پھر بیٹل آف قلندرز اور پھر نمیبیا کے دورے پر اعتماد کیا گیا۔ محمد نعیم نے بتایا کہ میں پارا چنار کا رہنے والا ہوں، وہاں سہولیات کی کمی تھی، کرکٹ نہیں کھیل سکتا تھا، کرکٹ نہ ہونے کی وجہ سے لاہور آ گیا تھا، لاہور قلندرز کے ٹرائلز دئیے اور سفر شروع ہو گیا۔ان کا کہنا ہے کہ کسی ایک فارمیٹ کے لیے مخصوص کر دینا ایک مائنڈ سیٹ ہے اس کے علاوہ کچھ نہیں، ہر کھلاڑی کا ایک ٹارگٹ ہوتا ہے کہ پاکستان کی ٹیسٹ کرکٹ میں نمائندگی کرنا ہے ، میرا بھی یہی ٹارگٹ ہے ، میں ایک فارمیٹ کے لیے مخصوص نہیں ہونا چاہتا ہوں نہ ہی لیبل لگوانا چاہتا ہوں۔
