سابق آسٹریلوی ٹیسٹ کرکٹر باب کاؤپر چل بسے
میلبرن(سپورٹس ڈیسک )سابق آسٹریلوی ٹیسٹ کرکٹر باب کاؤپر 84 سال کی عمر میں چل بسے ۔1966ء میں ایم سی جی میں انگلینڈ کے خلاف 307 رنز کی اننگز باب کاؤپر کی وجہ شہرت بنی۔۔
جو اُس وقت آسٹریلیا کی سرزمین پر سب سے بڑی ٹیسٹ اننگز تھی۔باب کاؤپر نے آسٹریلیا کی جانب سے 27 ٹیسٹ میچز کھیلے جس میں انہوں نے 2061 رنز بنائے ، جس میں 5 سنچریاں بھی شامل تھیں۔ کاؤپرنے فرسٹ کلاس کرکٹ میں وکٹوریا کی نمائندگی کرتے ہوئے 147 میچز میں 10 ہزار 595 رنز بنائے ، 26 سنچریوں کے ساتھ ان کا بیٹنگ اوسط 53.78 رہا، وہ پارٹ ٹائم آف سپنر بھی تھے ، فرسٹ کلاس میں 183 اور ٹیسٹ کرکٹ میں 36 وکٹیں حاصل کیں۔کرکٹ آسٹریلیا نے اپنے تعزیتی بیان میں کہا کہ باب کاؤپر ایک انتہائی باصلاحیت بائیں ہاتھ کے بلے باز تھے ، جنہیں ان کی نفیس بیٹنگ، کریز پر صبر اور بڑے سکور بنانے کی صلاحیت کے لیے یاد رکھا جائے گا۔باب کاؤپر نے محض 28 سال کی عمر میں اسٹاک بروکر اور مرچنٹ بینکر کی حیثیت سے اپنا کیریئر بنانے کی وجہ سے کرکٹ کو خیرباد کہہ دیا تھا۔باب کاؤپر بعد میں آئی سی سی میچ ریفری کے طور پر بھی خدمات انجام دیتے رہے ۔
