بابر اعظم کو بطور اوپنر ہی دیکھ رہے ہیں : مائیک ہیسن
لاہور(سپورٹس ڈیسک)پاکستان کرکٹ ٹیم کے ہیڈ کوچ مائیک ہیسن کا کہنا ہے کہ بابر اعظم سے وکٹ کیپنگ کے حوالے سے کوئی بات نہیں ہوئی،وہ بطور اوپنر ٹیم میں جگہ بنانے کیلئے کام کررہے ہیں۔
اگر وہ ٹیم میں جگہ بنائیں گے تو صائم یا فخر کے ساتھ کھیلیں گے ۔نیشنل بینک سٹیڈیم کراچی میں میڈیا سے گفتگو کرتے ہوئے قومی ٹیم کے ہیڈ کوچ کا کہنا تھا کہ ٹی 20کرکٹ سیریز کے سلسلے میں کیمپ لگایا گیا ہے ۔ کچھ چیزوں پر ہم کام کرنے کی کوشش کررہے ہیں۔ایک ہفتے تک ہمارا کیمپ جاری رہے گا۔حسن علی سے متعلق گفتگو کرتے ہوئے انہوں نے کہا کہ حسن علی ویسٹ انڈیز میں ٹیم کے ساتھ ہوں گے ۔حسن علی بہت اچھی کرکٹ کھیل رہے ہیں۔ ریگولرفاسٹ بولرز کی غیر موجودگی میں ہم نے دیگرکوموقع دیا ہے ۔ایسے کھلاڑی کو زیادہ موقع دیا جائے گا جو انٹرنیشنل پلان پر پورا اترتے ہوں گے ۔ سلمان مرزا کو حسن علی کی جگہ شامل کیا گیا ہے ۔ان کا کہنا تھا کہ شاہین شاہ آفریدی ورلڈ کلاس بولر ہیں۔حارث رؤف انجری کی وجہ سے ہمارے ساتھ نہیں ہیں۔ان کا یہ بھی کہنا تھا کہ کسی بلے باز کو یہ نہیں کہا کہ 150کے سٹرائیک ریٹ سے کھیلیں۔اگر ہم ٹی 20 میں پیچھے ہیں اس کی وجہ ہماری بیٹنگ ہے ۔ مارڈرن ڈے کرکٹ میں آپ کو تیز کھیلنا ہوتا ہے ۔ہیڈ کوچ مائیک ہیسن نے کہا کہ میں سلیکشن کمیٹی کا حصہ ہوں، 20 کھلاڑیوں کا انتخاب سلیکشن کمیٹی کرتی ہے ، کپتان اور کوچ 20 میں سے 15 کھلاڑیوں کا انتخاب کر کے چیئرمین کو دیتے ہیں۔
