کرکٹرز کیساتھ معاہدہ موجود ، کوئی فراڈنہیں ہوا، کمپنی مالک
چند دن میں ادائیگیاں کلیئر کر دی جائیں گی،صرف دو چیک باؤنس ہوئے ہیں کمپنی میں انویسٹمنٹ کی تھی، ہمارے ساتھ کوئی فراڈ نہیں ہوا:کھلاڑیوں کا موقف
لاہور (سپورٹس ڈیسک)قومی کرکٹرز کی انویسٹمنٹ کرنے والی کمپنی کے مالک نے بتایا ہے کہ کھلاڑیوں کی 2023 سے میرے ساتھ سرمایہ کاری ہے اور میرے پاس کھلاڑیوں کے ساتھ مکمل تحریری معاہدہ موجود ہے ۔ کمپنی مالک کا کہنا ہے کہ تمام کھلاڑیوں کے پاس میری کمپنی کے گارنٹی چیک بھی موجود ہیں اور میں فراڈ جیسے الزامات کی تردید کرتا ہوں۔کمپنی مالک نے بتایا کہ میں کبھی امریکا نہیں گیا اور نہ ہی میرے پاس امریکی ویزا ہے ، میں دبئی میں موجود ہوں اور تمام کھلاڑیوں سے رابطے میں ہوں۔ میری کمپنی دبئی بیسڈ ہے اور ہم ٹریڈنگ کا کام کرتے ہیں،پہلی مرتبہ ادائیگیاں تاخیر کا شکار ہوئیں، تاہم چند دن میں ادائیگیاں کلیئر کر دی جائیں گی۔انہوں نے مزید بتایا کہ میں پاکستانی ہوں اور پاکستان میں میری فیملی موجود ہے ۔
کھلاڑیوں کے علاوہ میرے پاس مزید انویسٹرز بھی موجود ہیں اور ہم باقاعدگی سے ادائیگیاں کرتے ہیں۔مبینہ فراڈ کی خبروں پر کھلاڑیوں نے اپنا مؤقف دیتے ہوئے کہا کہ ہم نے کمپنی میں انویسٹمنٹ کی تھی، ہمارے ساتھ کوئی فراڈ نہیں ہوا۔ کھلاڑیوں کا کہنا تھا کہ کمپنی ہم سے رابطے میں ہے اور مارچ تک تمام ادائیگیاں کلیئر کرنے کا وعدہ کیا گیا ہے ، صرف دو چیک باؤنس ہوئے ہیں۔کھلاڑیوں نے یہ بھی کہا کہ اس سلسلے میں چیئرمین کرکٹ بورڈ محسن نقوی نے بھی رابطہ کیا ہے ۔ کھلاڑیوں نے محسن نقوی کو بتایا کہ ابھی تک کوئی مسئلہ نہیں ہے اور اگر کچھ ہوا تو آگاہ کر دیا جائے گا۔قبل ازیں پاکستانی کرکٹرز سے جعلسازی سے کروڑوں کا فراڈ کرنے کی خبر سامنے آئی تھی۔ ذرائع کے مطابق کرکٹرز نے سابق کپتان کو دیکھتے ہوئے ایک کاروباری شخص کے ساتھ سرمایہ کاری کی۔
موجودہ کرکٹرز میں سابق اور موجودہ کپتانوں کے نام بھی شامل ہیں۔ذرائع کا کہنا ہے کہ پاکستان کے سابق اور موجودہ کرکٹرز کے ساتھ مبینہ فراڈ ہوا ہے ، تاہم کرکٹرز نے مبینہ فراڈ کی کسی پلیٹ فارم پر باضابطہ شکایت درج نہیں کرائی، نہ ہی کھلاڑیوں نے پاکستان کرکٹ بورڈ سے مسئلہ حل کرانے کے لیے رابطہ کیا۔
