طویل عرصے بعد عالمی ہاکی کی پاکستان واپسی کا امکان
طویل عرصے بعد عالمی ہاکی کی پاکستان واپسی کا امکان پی ایچ ایف نے کوریا کو 4 ٹیسٹ پر مشتمل سیریز کھیلنے کیلئے پاکستان مدعو کیا
لاہور(سپورٹس ڈیسک)پاکستان ہاکی فیڈریشن نے کوریا کو 4 ٹیسٹ پر مشتمل سیریز کھیلنے کے لیے پاکستان مدعو کیا ہے ۔پاکستان ہاکی فیڈریشن کے صدر محی الدین وانی نے ایک پروگرام میں گفتگو کے دوران بتایا کہ سیریز کے لیے بات چیت ابتدائی مرحلے میں ہے ۔ انہوں نے کہا کہ پی ایچ ایف کی خواہش ہے کہ جولائی کے آخری ہفتے میں سیریز پاکستان میں کھیلی جائے ۔ محی الدین وانی نے بتایا کہ اس سلسلے میں ابھی بات چیت جاری ہے جس کے بعد سیریز کے لیے شہروں کا حتمی فیصلہ ہوگا۔ان کا کہنا تھا کہ کوریا کا دورہ طے ہوگیا تو بین الاقوامی ہاکی کی پاکستان کی سرزمین پر واپسی سے ایک نئے سفر کی شروعات ہو سکے گی۔واضح رہے کہ پاکستان ہاکی ٹیم 15 سے 30 اگست تک ہونے والے ہاکی ورلڈ کپ میں روانگی سے قبل کوریا کے ساتھ 4 ٹیسٹ کی سیریز کھیلنے کی خواہشمند ہے ۔
