صدر مملکت کی عوام سے شجرکاری مہم میں حصہ لینے کی اپیل
اسلام آباد (دنیا نیوز) صدر مملکت آصف علی زرداری نے عوام سے مون سون شجرکاری مہم میں بڑھ چڑھ کر حصہ لینے کی اپیل کر دی۔صدر مملکت نے بلاول ہاؤس کراچی میں سالانہ مون سون شجر کاری مہم کے تحت نیم کا پودا لگایا۔
18 اگست پاکستان میں مون سون میں درخت لگانے کے قومی دن کے طور پر منایا جاتا ہے ۔صدر مملکت آصف علی زرداری نے کہا کہ قومی سطح پر جنگلات کی شرح میں اضافے کی ضرورت ہے ، موسمیاتی تبدیلی، عالمی درجہ حرارت میں اضافے کے منفی اثرات کم کرنے کیلئے زیادہ سے زیادہ درخت لگائے جائیں، پاکستان موسمیاتی تبدیلیوں اور گلوبل وارمنگ سے سب سے زیادہ متاثرہ ممالک میں سے ایک ہے ۔آصف زرداری نے کہا کہ نوجوان اور سول سوسائٹی جنگلات کے رقبے کو بڑھانے کے لئے زیادہ سے زیادہ درخت لگانے میں مدد کریں، نیم ماحول دوست درخت ہے ، اس کے بے شمار ماحولیاتی فوائد ہیں، نیم صاف ہوا، ٹھنڈی چھاؤں کے علاوہ قدرتی طور پر مچھروں کو دور کرتا ہے ۔صدر مملکت نے مزید کہا کہ بے نظیر بھٹو شہید کے وزیراعظم کی حیثیت سے پہلے دور حکومت میں بطور وزیر موسمیات خدمات انجام دیں، بے نظیر بھٹو شہید کے پہلے دور میں درخت لگانے کی مہم کا آغاز کیا، شجر کاری مہم کے تحت ملک بھر میں نیم کے درخت لگائے گئے تھے ۔ ان کا کہنا تھا کہ آج پاکستان میں بڑھتے درجہ حرارت کے پیش نظر درخت لگانے کی ضرورت اور بھی بڑھ گئی ہے ، قوم بالخصوص نوجوان اور سول سوسائٹی مون سون شجر کاری مہم میں بڑھ چڑھ کر حصہ لیں۔