مریم نواز نے پنجاب بھر میں سہولت بازار قائم کرنے کی منظوری دیدی
لاہور (سٹاف رپورٹر)وزیراعلیٰ مریم نوازشریف نے پنجاب بھر میں نئے سہولت بازار قائم کرنے کی منظوری دے دی اورانہوں نے 13نئے سہولت بازاروں کے زیر تکمیل پراجیکٹس کے لئے اگست تک کی ڈیڈ لائن مقررکر دی ۔
صوبے بھر میں نئے سہولت بازاروں کے قیام سے متعلق جائزہ اجلاس گزشتہ روز وزیراعلیٰ کی زیرصدارت ہوا ۔ اجلاس میں بہاولپور، اٹک اور مری میں اضافی سہولت بازار قائم کرنے کا اصولی فیصلہ کیا گیا،مریم نواز نے پنجاب بھر میں سہولت بازار کے قیام کا جامع پلان طلب کر لیا ۔ نوشہرہ ورکاں،بورے والا،کبیروالا، سانگلہ اور جلال پور میں سہولت بازار بنیں گے ۔وزیراعلیٰ نے رحیم یار خان، بہاولنگر، اٹک اور مری میں سہولت بازار کے لئے اراضی کی نشاندہی کا عمل جلد مکمل کرنے کا حکم اور ضلعی انتظامیہ کو سہولت بازاروں کیلئے اراضی مختص کرنے کی ہدایت کی۔ مریم نواز نے سہولت بازاروں کو سولر انرجی پر منتقل کرنے کے لئے 69کروڑ سے زائد فنڈز کی بھی منظوری دے دی ،جس سے بجلی کی لاگت میں 70فیصد تک کمی آئے گی۔انہوں نے جہلم، مظفر گڑھ اور نارووال میں سہولت بازار کے قیام میں درپیش رکاوٹیں دور کرنے کی ہدایت کی۔ مریم نواز نے کہا کہ سہولت بازار قائم کرنے کا مقصدکمزور اور متوسط طبقے کواشیائے خورونوش کم نرخ پرفراہم کرنا ہے ، قائد محمد نوازشریف کے ویژن کے تحت مہنگائی کا خاتمہ کیا جارہا ہے ۔
قبل ازیں پنجاب ماڈل بازار مینجمنٹ کمپنی کے سی ای او نوید رفاقت نے وزیراعلیٰ مریم نواز کو بریفنگ دیتے ہوئے بتایاکہ سہولت بازار میں خریداری پر عوام کو رمضان المبارک میں ایک ارب 11کروڑ روپے کی بچت ہوئی،خصوصی سہولت بازار کے سٹال پرعوام کو مختلف اشیا پر31فیصد ریلیف دیا گیا۔ وزیراعلیٰ نے کہا کہ عوام کو اشیاء خور ونوش کم از کم نرخ پر مہیا کرنا چاہتے ہیں،عوام کی خدمت اورمعاشی ریلیف ترجیحات میں اولین ہے ۔مریم نواز نے عالمی یوم ضمیر پر اپنے پیغا م میں کہاکہ انسانیت کی بقاء کے لئے ساکنان ارض کا ضمیرزندہ رہنا ضروری ہے ،یہ محبت،امن اوررواداری کی روایات برقرار رکھنے کے عزم کا اعادہ کرنے کا دن ہے ۔ مقبوضہ جموں وکشمیرکا مسئلہ 7دہائیوں سے عالمی ضمیر پر مسلسل دستک دے رہا ہے ،غزہ کے مظلوم مسلمانوں کی بیچارگی عالمی یوم ضمیرمنانے والوں کیلئے لمحہ فکریہ ہے ۔انسانی ضرورتوں کے درمیان ضمیرکے احساس کو برقرار رکھنا ہی انسانیت ہے ۔انہوں نے اوکاڑہ کے نواحی گاؤں میں آتشزدگی سے تین بچوں کے جاں بحق ہونے پر گہرے غم اور دکھ کا اظہارکرتے ہوئے سوگوار خاندان سے ہمدردی و تعزیت کا اظہار کیا اورکمشنر ساہیوال سے واقعہ کی رپورٹ طلب کرلی ۔
