اعلیٰ سطح کے تحقیقاتی کمیشن کیلئے چیئرمین ایم کیو ایم کا وزیر اعظم کو خط
کراچی (سٹاف رپورٹر) چیئرمین ایم کیو ایم ڈاکٹر خالد مقبول صدیقی کا وزیر اعظم کو خط، میاں شہباز شریف سانحہ گل پلازہ پر پاکستان کمیشن آف انکوائری ایکٹ کے تحت اعلیٰ سطح کا تحقیقاتی کمیشن تشکیل دیں۔
7 روز گزر جانے کے بعد اب تک کئی لوگ گمشدہ ہیں، لواحقین کو اپنے پیاروں کی لاشیں نہیں ملیں۔ خالد مقبول صدیقی نے کہاکہ 12 ہزار سے زائد خاندان اس آتشزدگی کے واقعہ میں براہ راست متاثر ہوئے ، 100 سے زائد افراد کی ہلاکت اور مالی نقصانات کی براہ راست ذمہ دار سندھ حکومت، صوبائی محکمے اور بلدیاتی ادارے ہیں، سندھ حکومت، میئر کراچی، ایس بی سی اے ، ادارہ ترقیات کراچی اور منسلک صوبائی و شہری محکمے مجرمانہ غفلت کے مرتکب ہوئے ہیں۔ انہوں نے خط میں مزید کہا کہ وفاق سانحہ گل پلازہ انکوائری کمیشن کے نام سے اعلیٰ سطح کی غیر جانبدارانہ اور شفاف کمیشن تشکیل دے جو حقائق سے پردہ اٹھائے اور مجرموں کو تعین کرے ، کمیشن میں ایف آئی اے ، نیب، این ڈی ایم اے ، ایم آئی، آئی ایس آئی، اسٹیٹ بینک، نیسپاک سمیت پروفیشنلز کو شامل کیا جائے ، وفاقی حکومت اور قانون نافذ کرنے والے ادارے فوری طور پر ریسکیو اور ریلیف کے انتظامات سنبھالیں تاکہ انسانی اعضا اور قیمتی اشیا محفوظ رہ سکیں۔ خط کے متن کے مطابق وفاق کے زیر انتظام ریلیف اور بحالی فنڈقائم کیا جائے تاکہ لواحقین اور متاثرین کی مالی مدد کی جاسکے ۔
