وزیراعظم کا دورۂ مظفر آباد

وزیر اعظم نواز شریف کا دورہ مظفر آباد کئی پہلوئوں سے اہمیت کا حامل ہے۔ انہوں نے اس موقع کو مسئلہ کشمیر اجاگر کرنے کے لیے بھی استعمال کیا۔ حریّت کانفرنس کے راہنمائوں کے ساتھ تبادلہ خیال کیا۔ یاد رہے کہ محض چند ہفتے قبل دہلی میں کشمیری راہنمائوں کے ساتھ مشیر امور خارجہ سرتاج عزیز کی تفصیلی ملاقات ہوئی تھی۔ وزیر اعظم نواز شریف نے کشمیر کی آزادی اور خطّے کی فلاح و بہبود سے ذاتی لگائو کا ذکر کیا اور شرکا ء کو بتایا کہ اس علاقے کی تقدیر بدلنے کے لیے وہ میگا منصوبوں کا آغاز کرنا چاہتے ہیں۔ سب سے دلچسپ بات یہ ہے کہ انہوں نے آزاد کشمیر کی ترقی کے لیے کنٹرول لائن پر امن کو ضروری قراردیا‘ جبکہ کچھ حلقوں کا خیال ہے کہ کنٹرول لائن پر کشیدگی کا برقرار رہنا مسئلہ کشمیر کو زندہ رکھنے اور بھارت پر دبائو ڈالے رکھنے کے لیے ضروری ہے۔

اس وقت آزاد کشمیر میں پیپلز پارٹی کی حکومت ہے۔ چند ماہ قبل وزیر اعظم چودھری مجید کے خلاف عدم اعتماد کی تحریک محض اس وجہ سے کامیاب نہ ہوئی کہ وزیر اعظم نواز شریف نے چودھری مجید کو اپنا وزیر اعظم قراردیا اور تحریک عدم اعتماد کی حمایت سے انکار کر دیا تھا۔ نواز شریف پہلے پاکستانی وزیر اعظم ہیں جو کشمیر کونسل کے بجٹ اجلاس میں شرکت کے لیے مظفر آباد گئے۔ مظفر آباد ایک ایسا دارالحکومت ہے جہاں اس کے اپنے صدر اور وزیر اعظم بھی بھول کر قدم نہیں رکھتے۔ وہ زیادہ وقت اسلام آباد میں گزارتے ہیں۔ اکثر اعلیٰ سطحی اجلاس بھی اسلام آباد میں طلب کرتے ہیں۔ بسا اوقات وزرا ء اور مشیروں سے حلف بھی اسلام آباد ہی میں لے لیا جاتا ہے۔ ان حالات میں وزیر اعظم نواز شریف کا مظفر آباد جانا اور پورا دن حکومت اور حزب اختلاف کی جماعتوں کے ساتھ تبادلہ خیال کرنا مثبت پیش رفت ہے۔

وزیر اعظم نواز شریف نے آزاد کشمیر کی ترقی کے لیے بڑے اہم اعلانات کیے‘ جن میں مظفر آباد کو ٹرین کے ذریعے راولپنڈی اسلام آباد سے ملانا‘ آزاد کشمیر کو گلگت بلتستان سے مربوط کرنا‘ مظفر آباد اور راولا کوٹ میں بین الاقوامی معیار کے ہوائی اڈے تعمیر کرنا اور مظفر آباد کو جدید شاہراہ کے ذریعے میرپور سے ملانے کے منصوبے بھی شامل ہیں۔ ملک کی اقتصادی صورتحال کے پیش نظر یہ منصوبے بظاہر دیوانے کی بڑ نظر آتے ہیں لیکن اگر وفاقی اور آزاد کشمیر کی حکومتیں نیک نیتی سے کام کریں تو یہ خواب شرمندۂ تعبیر ہو سکتے ہیں۔

آزاد کشمیر کی 67 فیصد شرح خواندگی پاکستان کے چاروں صوبوں سے زیادہ ہے۔ یہاں کی آبادی کا ایک بہت بڑا حصہ برطانیہ، امریکہ‘ کینیڈا اور خلیجی ریاستوں میں برسرِروزگار ہے۔ ایک مطالعے کے مطابق کشمیری پاکستان کی کل آبادی کا محض دو فیصد ہیں لیکن زرمبادلہ میں ان کا حصہ 6.25 فیصد سے اوپر ہے۔ بیرون ملک آباد کشمیری سرمایہ کاروں کے پاس سرمائے کی کمی نہیں۔ ہنرمند اور تعلیم یافتہ کارکن بھی دستیاب ہیں۔ چھوٹے سے علاقے میں 25 ملکی اور غیرملکی بینکوں کی 441 سے زائد شاخیں قائم ہیں۔ ان بینکوں میں دو سو ارب سے زائد روپیہ بے مصرف پڑا ہے جو معاشی سرگرمیوں کو منظم کرنے کے لیے استعمال ہو سکتا ہے۔

سیاحت کے لیے یہ علاقہ آئیڈیل ہے۔ اس سال چھ لاکھ سے زائد سیاحوں نے نیلم ویلی اور راولا کوٹ کا رخ کیا۔ غیرملکیوں کو ان علاقوں میں داخلے کی اجازت نہیں ورنہ وہ بھی اس علاقہ میں سیر کی غرض سے آتے‘ بالخصوص بیرون ملک آباد کشمیر ی غیرملکی دوست احباب کو یہاں کی سیاحت کے لیے مدعو کر سکتے ہیں۔ ٹریکنگ‘ ہائیکنگ اور پیراگلائیڈنگ جیسے تفریحی منصوبے شروع کرنے کے وسیع امکانات موجودہیں۔ سیاحوں کو رہائش‘ کھانا اور راہنمائی فراہم کرنے کے لیے اربوں روپے کے انفراسٹرکچر کی ضرورت ہے۔ پن بجلی کے منصوبوں کے لیے یہ علاقہ بہترین ہے۔ بجلی پیدا کرنے اور اسے واپڈا کو فروخت کرنے پر غیرمعمولی طور پر کم لاگت آتی ہے۔

ان امکانات کے باوجود آزاد کشمیر ترقی نہیں کر رہا ۔ بزرگ سیاستدان سردار عبدالقیوم خان کہا کرتے ہیں کہ جو چار جماعتیں پڑھ جاتا ہے‘ وہ راولپنڈی‘ لاہور یا کراچی نقل مکانی کر جاتا ہے یا جس کے پاس چار پیسے آجاتے ہیں وہ یورپ کو اپنا بسیرا بنا لیتا ہے۔ نمل یونیورسٹی کے استاد وقاص علی کی ایک تحقیق کے مطابق گزشتہ محض پانچ برسوں میں سوا لاکھ کے لگ بھگ نوجوان روزگار کی تلاش میں بیرون ملک سدھار چکے ہیں۔ مسلم کانفرنس کے نوجوان راہنما عثمان عتیق خان نے کسی موقع پر بڑی دلچسپ بات کہی: 'ہم کچرے کے ساتھ سیاست اور انتظامیہ چلاتے ہیں۔ لعل و گوہر تو یورپ چلے جاتے ہیں یا پھر پاکستان کے بڑے شہروں کی نذر ہو جاتے ہیں‘۔

آزاد کشمیر کا سب سے بڑا مسئلہ یہ ہے کہ یہاں اچھی اور فعال حکومت کی فراہمی کا تصور دم توڑ چکا ہے۔ سرکاری حکام کا ذکر ہی کیا‘ یہاں وزرا اور وزیر اعظم تک ہر منصوبے میں حصہ مانگتے ہیں۔ ایک تحقیق کے مطابق میرپور کے رہائشی منصوبے جناح ٹائون میں بڑے پیمانے پر کرپشن کی گئی۔ چند ماہ قبل میرپور میں کلک اینڈکلک سیکنڈل سامنے آیا جس میں شہریوں کے پانچ ارب روپے ڈوب گئے۔ نیلم ویلی روڈ اور مظفر آباد کی تعمیر نو پر اربوں روپے کی کرپشن کی اطلاعات ہیں۔ بدقسمتی یہ ہے کہ حکومت ان الزامات کی شفاف تحقیقات کرا کے مجرموں کو قرار واقعی سزا دینے میں لیت و لعل سے کام لیتی ہے۔

مالی کرپشن کو چھوڑیئے؛ 35 لاکھ آباد ی کے اس چھوٹے سے خطّے کو چلانے کے لیے‘ جس کا رقبہ ضلع کوہستان سے بھی کم ہے 26 وزیر‘ 74 مشیر اور 150 کے لگ بھگ کوآرڈی نیٹر اور ضلعی کوآرڈی نیٹر تعینات ہیں۔ ستم ظریقی یہ ہے کہ نوے ہزار کے قریب سرکاری ملازمین ہیں۔ 55 ارب کے سالانہ بجٹ میں محض دس ارب پچاس کروڑ روپے ترقیاتی کاموں پر خرچ ہوتا ہے باقی سارا بجٹ غیرترقیاتی اخراجات کی مد میں استعمال ہوتا ہے۔ ایسے لچھن ہوں تو ترقی کیسے ہو سکتی ہے؟

آزاد کشمیر کی بدقسمتی یہ ہے کہ یہاں فعال میڈیا ہے اور نہ سول سوسائٹی۔ اپوزیشن جماعت نون لیگ اور اس کے سربراہ راجہ فاروق حیدر خان ان مسائل پر صدائے احتجاج بلند کرتے رہے لیکن وفاقی حکومت نے توجہ نہ دی۔ اب مظفر آباد میں راجہ فاروق حیدر خان اور دیگر سیاسی اور سماجی جماعتوں نے وزیر اعظم کو ان مسائل کی طرف متوجہ کیا تو انہیں احساس ہوا کہ یہ خطّہ بھی ان کی توجہ چاہتا ہے؛ چنانچہ حکومت آزاد کشمیر کے اختیارات محدود کیے جا رہے ہیں۔ اسلام آباد نے چودھری مجید کو انیس نکاتی ہدایت نامہ بھیجا کہ وہ تمام ترقیاتی منصوبے اور انتظامی معاملات چیف سیکرٹری کی مشاورت سے سرانجام دیں۔ وزیر امور کشمیر برجیس طاہر مسلسل آزاد کشمیر کے دورہ کرتے ہیں۔

اچھا ہوتا کہ چودھری مجید بہتر کارکردگی کا مظاہرہ کرتے۔ پیپلز پارٹی کی نیک نامی میں اضافہ ہوتا‘ لیکن 'مال مفت دلِ بے رحم‘ والا معاملہ رہا۔ اب بدعنوانی روکنے کے نام پر انتظامی اختیارات کم کیے جا رہے ہیں جو خطرناک رجحان ہے۔ ایک بار وزارت امور کشمیر طاقت ور ہو گئی تو اس جن کو بوتل میں بند کرنا مشکل ہو جائے گا۔