پنڈورا بکس نہ کھولیں!

وزیر اعظم نواز شریف نے خانہ جنگی کا خطرہ دور کرنے کے لئے شدت پسندوں کے ساتھ مذاکرات کا فیصلہ کر کے بلاشبہ ایک تاریخی اقدام کیا۔ بقول وزیر اعظم یہ امن کے لئے آخری موقع تھا۔ ابتدائی رابطوں اور تیاریوں کے طور پر تحریک طالبان پاکستان اور حکومت پاکستان‘ دونوں کی طرف سے مذاکراتی کمیٹیاں تشکیل دی گئیں‘ جن کا بنیادی کام دونوں فریقوں کو مذاکرات کی میز پر اکٹھا کرنے تک محدود تھا۔ اس کے بعد اصل فیصلے حکومت اور ٹی ٹی پی کے درمیان ہونا تھے۔ یہ کمیٹیاں 20 دنوں تک مذاکرات کی سمت میں تو کوئی پیش رفت نہ کر سکیں؛ البتہ آئین کو متنازعہ بنانے کے لئے ایک ایسی بحث چھیڑ دی جو پاکستان کی پوری تاریخ میں ہمیشہ سیاسی عدم استحکام کا ذریعہ رہی۔ آئین سازی کے سوال پر ڈیڑھ دو سال پہلے تک تباہی و بربادی کا سلسلہ جاری رہا۔ تب کہیں جا کر 2012ء میں ریاست کی بنیادی دستاویز مکمل ہوئی۔ اس کے بعد خیال تھا کہ آئین پر تباہ کن اور اعصاب شکن تنازعات ختم ہو جائیں گے اور ہم بھی دیگر اقوام کی طرح تحریری یا روایات پر مبنی مستقل آئین کے تحت‘ اداروںاور سیاسی نظام کو استحکام دینے میں مصروف ہو جائیں گے۔

مذاکراتی کمیٹیاں بننے سے پہلے‘ آئین کہیں بھی زیر بحث نہیں تھا۔ حکومت اور ٹی ٹی پی کے مابین صرف ایک نکاتی ایجنڈے پر بات چیت ہونا تھی اور وہ یہ کہ دہشت گردوں کو پُرامن اور معمول کی زندگی میں واپس لا کر بلاوجہ کی خونریزی سے روکا جائے۔ نہ حکومت پاکستان اس سے زیادہ کچھ کرنے کا اختیار رکھتی ہے اور نہ تحریک طالبان پاکستان۔ آئین کے بارے میں اگر کہیں سوال اٹھایا جا سکتا ہے تو وہ صرف پارلیمنٹ ہے۔ لیکن ماضی کے تلخ تجربات سے اگر ہمیںکچھ سیکھنا چاہیے تو اس میں پہلا سبق یہ ہے کہ اب آئین کو انتہائی ناگزیر صورتحال کے بغیر نہ چھیڑا جائے گا۔ مگر اپنی مذاکراتی ٹیم کے ذریعے‘ طالبان کی طرف سے پہلا پیغام ہی یہ دیا گیا کہ و ہ پاکستان کے موجودہ آئین کو نہیں مانتے۔ یہ اندازہ کرنا محال نہیں کہ اس مطالبے کے پیچھے پاکستان کے بعض سیاسی عناصر کا بھی ہاتھ ہے‘ جو چاہتے ہیں کہ بے پناہ نقصانات اٹھانے کے بعد‘ ہم نے سیاسی استحکام کے جس راستے پر قدم رکھا ہے‘ اس پر مزید آگے نہ بڑھ سکیں اور ایک بار پھر آئینی جھگڑے شروع کر کے‘ ماضی کی تباہ کن تاریخ دہراتے رہیں۔

طالبان اور ان کے حامیوں کو شاید اس کا اندازہ نہ ہو کہ پاکستان کس کربناک اور اعصاب شکن صورتحال سے گزرتا ہوا‘ ایک متفقہ آئین تک پہنچا ہے اور طالبان نے اسلام کا نام لے کر ہمارے آئین کو متنازعہ بنانے کی جو کوشش کی ہے‘ اس کا بھی کوئی جواز موجود نہیں۔ انہیںمعلوم ہونا چاہیے کہ پاکستان کے آئین کو پارلیمنٹ کی آخری منظوری تک‘ اسلامی اصولوں کے تحت مرتب کرنے کے عمل میں ملک و قوم کیسے کیسے مرحلوں اور امتحانوں سے گزرے ہیں؟ آئین پر نئی بحث چھیڑنے کے آرزومندوں کی یاددہانی کے لئے میں پاکستان میں آئین سازی کے دوران پیش آنے والی مشکلات اور آزمائشوں کا اجمالی سا جائزہ لینا چاہتا ہوں۔

پاکستان اور بھارت دونوں نے 1947ء میں آزادی کے بعد ایک عبوری آئینی انتظام کے تحت اپنے سفر کا آغاز کیا۔ یہ عبوری آئین انڈین انڈیپینڈنٹ ایکٹ 1947ء پر مبنی تھا۔ بھارتی قیادت نے آزادی حاصل کرتے ہی ڈاکٹر امبیدکر کو آئینی مسودے کی تیاری پر مامور کر دیا۔ انہوں نے مختصر عرصے میں آئینی مسودہ تیار کر کے‘ پارلیمنٹ کی آئینی کمیٹی کے حوالے کیا۔ اس آئینی مسودے پر 2 سال 11 مہینے 18 دن بحث ہوئی 2 دن‘ رسمی کارروائیوں میں لگ گئے۔ اس دوران بھارت کا پورا آئین کاتبوں سے لکھوایا گیا‘ جس کے ہر صفحے پر آرٹسٹوں نے ہاتھ سے خوبصورت نقش و نگار میں رنگ بھر کے حاشیہ لگایا۔ ایسی 2 کاپیاں تیار کی گئیں۔ 26 جنوری 1950ء کو آئین منظور کر لیا گیا۔ آئین کی منظوری سے چند ماہ بعد تک‘ اس میں ضروری ترامیم ہوتی رہیں‘ جیسے سوشلسٹ اور سیکولر کے الفاظ کی وضاحت کو 1956ء میں آئین کا حصہ بنایا گیا۔ ان بنیادی اور لازمی تبدیلیوں کے بعد‘ آئینی تقدس کی روایت جڑ پکڑنے لگی۔ بعد ازاںبھارتی آئین میں ہونے والی ترامیم انگلیوں پر گنی جا سکتی ہیں۔ پاکستان میں ابھرنے والی نئی سیاسی سوچ کے مطابق تو ہندو اکثریت کے ملک میں‘ ایک اچھوت کا بنایا ہوا آئین برداشت ہی نہ کیا جاتا۔ لیکن بھارت کے تمام مذہبی اور نسلی گروہوں کی نمائندہ پارلیمنٹ نے‘ آزاد ملک کا آئین نافذ کر دیا۔ بھارت میں آئین کے احترام کی روایات کو اتنا تقدس حاصل ہے کہ دو تہائی اکثریت بھی کئی معاملات میں آئینی ترمیم کرنے کا حوصلہ نہیں کر سکی۔ مثلاً بھارتی پارلیمنٹ میں خو اتین کی نشستیں مخصوص کرنے کے سوال پر‘ وہاں کی بڑی پارٹیاں متفق ہیں لیکن انہیں آئین میں ترمیم کرنے کا حوصلہ نہیں پڑا۔

بھارت اور پاکستان دونوں ایک ہی وقت میں آزاد ہوئے تھے۔ بھارت نے 3 سال کے اندر اندر اپنا نظام مملکت‘ نئے آئین کے تحت چلانا شروع کر دیا اور پندرہ بیس سال کے مختصر عرصے میں آئینی روایات قائم ہونے لگیں اور آج بھارت میں آئینی روایات کا بڑی حد تک برطانیہ کی طرح احترام کیا جاتا ہے۔ اس کے برعکس پاکستان میں آئین سازی کی کہانی انتہائی دردناک ہے۔ ہم 23 سال تک تو عبوری آئین کے تحت امور مملکت چلاتے رہے۔ قومی اسمبلی کو شروع ہی سے آئین ساز ادارے کی حیثیت دے دی گئی تھی۔ لیکن مذہبی حلقوں کی طرف سے دبائو شروع ہو گیا کہ پاکستان کے آئین کو اسلامی ہونا چاہیے۔ اس بحث میں وقت کے ساتھ ساتھ تلخی اور محاذ آرائی کی کیفیت پیدا ہوتی گئی۔ مذہبی عناصر کے دبائو کے ساتھ‘ اقتدار کی کشمکش نے بھی جڑیں پکڑ لیں۔ یہ کشمکش ہمہ جہت تھی۔ ایک طرف مذہبی عناصر آئین کو اسلامی بنانے پر مصر تھے۔ دوسری طرف گورنر جنرل اور وزیر اعظم کے درمیان اقتدار کی کشمکش شروع ہو گئی اور تیسرا تنازعہ مشرقی اور مغربی پاکستان کے نمائندوں کے مابین شروع ہو گیا۔ اس سہ جہتی کشمکش نے اتنا زور پکڑا کہ آئین سازی بھلا دی گئی اور 1954ء میں گورنر جنرل نے آئین ساز اسمبلی ہی کو تحلیل کر دیا۔ پاکستان میں پہلی آئین شکنی کا مقدمہ وفاقی عدالت میں گیا۔ سپیکر مولوی تمیزالدین نے جس مفلوک الحالی میں پاکستانی جمہوریت کا مقدمہ لڑا‘ اس کا اندازہ اس سے کیا جا سکتا ہے کہ مولوی تمیزالدین مقدمے کی سماعت میں شریک ہونے کے لئے سائیکل رکشہ پر عدالت میں جایا کرتے تھے۔ ایک طرف جمہوریت کا یہ بے سروسامان سپاہی اکیلا تھا اور دوسری طرف تمام طاقتور گروہوں نے گٹھ جوڑ کر کے گورنر راج کا تحفظ شروع کر دیا۔ اس دوران غلام محمد نے من مانے قوانین بنا کر‘ دستور ساز اسمبلی بحال کی اور کٹھ پتلی وزرائے اعظم لگا کر حکومت چلائی۔ اس دوران غلام محمد کی صحت جواب دینے لگی۔ 6 اگست 1955ء کو انہوں نے دو ماہ کی رخصت لی اور میجر جنرل سکندر مرزا کو قائم مقام گورنر جنرل نامزد کر دیا۔ اس کے بعد دوسرا اذیت ناک دور شروع ہوا۔ سکندر مرزا نے بوگرا حکومت ختم کر کے چوہدری محمد علی کو وزیر اعظم بنا دیا۔ انہوں نے مختلف علمائے کرام کی ہدایات کے تحت 1956ء کا آئین نافذ کیا۔ اس آئین کے نفاذ پر کم و بیش تمام مذہبی جماعتوں نے اظہار مسرت کیا۔ 1956ء کا پہلا متفقہ آئین کالعدم کر کے سکندر مرزا نے مارشل لا نافذ کیا۔ اقتدار پر ایوب خان کا قبضہ ہوا۔ انہوں نے 1962ء میں اپنی مرضی کا آئین نافذ کر دیا‘ جس کی ملک کے دونوں حصوں میں مخالفت کی گئی۔ ایوب خان نے امور مملکت میں مشرقی پاکستانیوں کو اپنے حصے کے مطابق شرکت کا حق نہیں دیا‘ جس پر وہاں بغاوت کی صورتحال پیدا ہونے لگی۔ ایوب خان نے دوبارہ مارشل لا نافذ کر کے‘ اقتدار یحییٰ خان کو دیا۔ اس نے بنگالیوں کو ون مین ون ووٹ کا حق دے کر عام انتخابات کا اعلان کر دیا۔ یاد رہے‘ اس سے پہلے مغربی اور مشرقی پاکستان کو مساوی درجہ دے کر‘ ملک کی 54 فیصد آبادی کو مغربی پاکستان کی 46 فیصد آبادی کے برابر کر کے‘ اسے پیرٹی کا نام دیا گیا تھا۔ 1970ء کے انتخابات ہوئے اور نئی منتخب جماعتوں میں آئین سازی پر اختلاف ہو گیا اور یحییٰ خان نے اس کا فائدہ اٹھاتے ہوئے نئی آئین ساز اسمبلی برطرف کر کے اپنے اقتدار کو طول دینے کی کوشش کی۔ مشرقی پاکستان میں خانہ جنگی شروع ہو گئی۔ بھارت نے صورتحال کا فائدہ اٹھا کر حملہ کر دیا اور پاکستان کو شکست کا سامناکرنا پڑا۔ سقوط مشرقی پاکستان کے بعد نئے پاکستان میں طویل مشاورت اور ملک کے تمام مکاتب فکر کی مشاورت اور رضامندی سے 1973ء کا آئین نافذ کیا گیا۔ اس آئین کی تیاری میں تمام مذہبی جماعتوں نے بھرپور حصہ لیا۔ ضیاالحق نے 8ویںآئینی ترمیم کے ذریعے علماء کے مرتب کردہ 22 نکات کو{ جو پہلے صرف آئین کا دیباچہ تھے‘ باقاعدہ آئین کا حصہ بنا دیا۔ اس تبدیلی کے بعد تمام صوبے اور تمام مذہبی مسالک کے جید علماکرام مطمئن ہو گئے۔ بھٹو صاحب نے اس آئین میں جو ترامیم کی تھیں‘ انہیں بعد میں نکال دیا گیا اور 2012ء میں 20ویں ترمیم کے بعد‘ آئین پر اعتراضات ختم ہو گئے۔ ابھی دو سال ہی گزرے ہیں کہ ایک بار پھر اسلامی آئین کا مسئلہ اٹھا کر پنڈورا بکس کھولنے کی کوشش ہو رہی ہے۔ پاکستانی عوام اپنے موجودہ آئین پر اتفاق رائے رکھتے ہیں۔ لیکن دہشت گردی کے سوال پر مذاکرات کے بہانے طالبان کی طرف سے پھر سے آئین کو مسترد کرنے کی بات آ گئی۔ میں نے پاکستان میں آئین سازی کے دردناک تجربات کا شکستہ سا خاکہ اس لئے پیش کیا ہے کہ عوام‘ میڈیا اور فیصلہ سازی پر اختیار رکھنے والوں کو اندازہ ہو کہ آئین سازی کے عمل میں‘ پاکستان نے اپنی آزادی کا تین چوتھائی حصہ متفقہ آئین کے بغیر گزارا ہے۔ اس دوران ملک کی نصف سے زیادہ آبادی ہم سے الگ ہو گئی۔ آئین سازی کے سوال پر بے شمار احتجاجی تحریکیں چلیں۔ جمہوریت کے سینکڑوں حامی گولیوں کا نشانہ بنے۔ میں تمام اہل وطن سے دردمندانہ اپیل کروں گا کہ ازراہ کرم آئین کی تقدیس کی روایت کو مستحکم ہونے دیں۔ آئین کو از سر نو بنانے کی غلطی کی‘ تو پھر سے پنڈورا بکس کھل جائے گا۔ اس دوران 1971ء سے زیادہ تباہ کن واقعات جنم لے سکتے ہیں۔ پاکستان کے موجودہ آئین پر ملک کے کم و بیش تمام برگزیدہ علمائے کرام مہر تصدیق ثبت کر چکے ہیں۔