حسبِ ضرورت یا نظریہء ضرورت؟

یہ جمعہ کا دن تھا‘ تاریخ 24 جولائی۔ 'اختلافی نوٹ‘ میں بیٹھا تو موضوع ایسا تھا‘ جس نے پاکستان کی عدالتی تاریخ کو نئے موڑ سے روشناس کرایا۔ عدالت کا وہ فیصلہ جو محفوظ ہو جائے اور ابھی صادرہونا باقی ہو‘ اس کے بارے میں رائے زنی کرنا انتہائی حساس معاملہ ہے۔ یہ مجھے معلوم تھا۔ لیکن میں یہ بھی جانتا تھا کہ اطلاعات تک رسائی عوام کا بنیادی حق ہے۔ بطور وفاقی وزیر قانون اس آئینی حق کی میں نے ہی تدوین کی تھی‘ آئین پاکستان مجریہ 1973ء میں آرٹیکل 19-A کا اضافہ کر کے۔ اس لیے میں نے اللہ کا نام لیا اور جو کچھ جانتا تھا وہ قوم کے سامنے کھول کر رکھ دیا۔ مالکِ ارض و سماء بھی یہی چاہتے ہیں اسی لیے ارشاد فرمایا: قُولُو قَولاً سدیدََا (اور سیدھی بات کہو) سورۃ الاحزاب آیت: 70۔

2010ء میں ہونے والی اٹھارہویں آئینی ترمیم اور پشاور میں بچوں کی 2014ء والی کربلا کے بعد اکیسویں آئینی ترمیم کے بارے میں فیصلہ قوم کے سامنے ہے۔ اختلافی نوٹ میں سو فیصد اسی فیصلے کی پیشین گوئی کی گئی تھی۔ جب تازہ وکالت نامہ آپ کے ہاتھ میں ہو گا‘ تب تازہ فیصلے پر تبصروں، تجزیوں کا سونامی بھی ساتھ آئے گا۔ آج میں آپ سے وہ باتیں کرتا ہوں‘ جو مختلف ہیں اور آپ کے لیے نئی بھی ہوں گی۔

بہت کم لوگوں کو معلوم ہے کہ پچھلے سیاسی چیف جسٹس کے دور میں پاکستان کی عدلیہ کے ایک، دو، چار نہیں بلکہ سینکڑوں فیصلے مشترکہ یا متفقہ صادر ہوئے۔ دنیا کی عدالتی، وکالتی، قانونی اور آئینی تاریخ میں ایسا ریکارڈ شاید ہی کسی اور ملک کے حصے میں آیا ہو۔ فیصلے مشترکہ یا متفقہ صادر کرنے کے لیے سیاسی چیف جسٹس سپریم کورٹ میں بڑے سیاسی مقدمات کی سماعت کے لیے بنچ بنانے کے اختیارا ت کو سیاسی طور پر استعمال کرتا۔ جو جج جسٹس جاوید اقبال یا جسٹس سردار رضا کی طرح اس سے اختلاف کرتے ان کو ایسے بنچوں میں شامل ہی نہیں کیا جاتا تھا۔ اس کے ساتھ ساتھ ایک بہت بڑی روایت یہ بھی ڈالی گئی کہ سینئر بنچ میں سینئر ججوں کو بٹھانے کے بجائے کبھی ایڈہاک جج اور کبھی جونیئر جج صاحبان بٹھائے جاتے۔ پھر جس ایل ایف او کے ذریعے یہ شخص خود جج بنا اور جس کی حمایت میں فیصلہ دے کر اس نے جنرل مشرف کو ''ون مین‘‘ پارلیمنٹ اور ساتھ آئین میں ترمیم کا اختیار دیا بلکہ ساتھ ساتھ تین سال کے لیے ملک کی خدمت کا سرٹیفکیٹ بھی‘ اسی کو بنیاد بنا کر اس نے ملک بھر کی عدالتوں سے 200 قابل ترین ججوں کو غیر آئینی طور پر گھر بھجوا دیا۔ ان فاضل ججوںکو وہ اپنا ''مخالف کیمپ‘‘ کہتا تھا۔ پھر وہ اپنے مخالف وکیلوں پر حملہ آور ہوا۔ اس قبیلے کی سربراہی خدا نے میرے نام لکھی‘ جس پر اس کا لاکھ لاکھ شکر۔ وہ یہیں نہیں رکا‘ اس نے نکالے گئے ججوں اور عدالتی ہستیوں کو پینشن کے حق سے بھی محروم کر ڈالا۔ وہ جج کم اور سیاسی ٹریڈ یونین کا لیڈر زیادہ لگتا تھا۔ بے معنی نعرے، لایعنی بڑھکیں اور سرکاری خرچ پر سیاست اس کا اوڑھنا بچھونا تھا۔

آئیے آپ کو لندن لے چلوں‘ جہاں رائل ہائی کورٹ آف انگلینڈ اینڈ ویلز کی چھوٹی سی عمارت ہے۔ اس کے ایک فلور پر تین جج بیٹھے مقدمے کی سماعت کر رہے ہیں۔ وکلا سمیت سائل ایسے لکڑی کے پھٹے نما بنچوں پر بیٹھے ہیں‘ جو ہمارے دیہی ریلوے سٹیشن کی نشست گاہ یا جنگل ہوٹل کی کرسیوں جیسے ہیں۔ تینوں جج عدالت میں خود داخل ہوئے۔ ہمارے ہاں کُلّہ پہنے تین آدمی آگے ہوتے ہیں جو جج صاحب کی عینک، پنسل، ریشمی غلاف والا پانی کا گلاس لا کر رکھتے ہیں‘ پھر زمین پر انتہائی تکّبر سے جُوتا مار کر جج صاحب کی آمد کا اعلان کیا جاتا ہے۔ پھر یہ سفید پوش ملازم جج کی کرسی پیچھے کھینچ کر اسے بٹھا کر نیچے آتا ہے۔ ہائی کورٹ آف انگلینڈ اینڈ ویلز میں جج اپنی کرسی پر خود بیٹھے۔ ان کے درمیان کم از کم آٹھ سے دس فٹ کا فاصلہ ہے۔ کیس کی سماعت کے دوران وہ ایک دوسرے سے بات نہیں کر سکتے۔ عدالت کی اکلوتی معاون ٹائپ رائٹر والی ایک خاتون سی او سی یعنی کلرک آف کورٹ کہلاتی ہے۔ اس نے انتہائی سنجیدگی سے کہا: آل رائیز۔ جج آئے، جج انصاف کی کرسی پر بیٹھے اور تمام حاضرین کھڑے ہو گئے۔ اس کے مقابلے میں پاکستان کی بعض عدالتوں میں انصاف کا لٹھ اٹھا کر جج صاحب کے آگے چلنے کا رواج ہے۔ ہائی کورٹ آف انگلینڈ اینڈ ویلز کے جج وقفہ کر کے خود ہی اُٹھ گئے‘ پھر واپس آئے اور اپنی اپنی زبان سے اپنا اپنا فیصلہ سنایا۔ پاکستان کی سب سے بڑی عدالت نے اٹھارہویں اور اکیسویں آئینی ترمیم جیسے اہم مقدمہ پر بڑے لمبے عرصے کے بعد اختلافی فیصلہ دیا۔ جن جج حضرات نے آئینی ترمیم کو بحال رکھا‘ انہوں نے آئین کے آرٹیکل 238 کو مدِنظر رکھا۔

238; subject to this part, the constitution may be amended by Act of [majlis-e-shoora (parliament)]

آرٹیکل 238 آئین میں ترمیم کا اختیار پاکستان کی پارلیمنٹ کو دیتا ہے۔ سپریم کورٹ کا اکثریتی فیصلہ اس آرٹیکل کی منشاء کے مطابق ہے‘ لیکن جو فاضل جج حضرات اس فیصلے سے متفق نہیں تھے‘ انہوں نے اپنے علیحدہ علیحدہ اختلافی نوٹ لکھ ڈالے۔ natural justice یعنی فطری انصاف کا تقاضا یہی ہے کہ جج علیحدہ علیحدہ واقعات، قانون، شہادت اور آئین کا جائزہ لے۔ اس پر اپنا دماغ لگائے پھر انصاف کے کٹہرے میں کھڑے دونوں فریقوں کے نقصانات، تکلیف اور حرج یا خرچ کا تحمینہ لگا کر فیصلہ صادر کرے۔ اس لیے اختلافی نوٹ لکھنے والے جج صاحبان کو میری طرف سے خراجِ تحسین پیش ہے۔ ان کے لکھے ہوئے اختلافی نوٹ بھی عدالتی تاریخ کا ریکارڈ اور اثاثہ ہیں۔ جو انہوں نے اپنے نقطہ نظر سے درست سمجھا‘ وہ کھل کر لکھ ڈالا۔ ان دونوں فیصلوں نے ملک کی سب سے بڑی عدالت میں عدل کا چہرہ شفاف کر دیا۔ اٹھارہویں آئینی ترمیم کے ذریعے آئین کے باب نمبر11‘ آرٹیکل 239 میں ذیلی آرٹیکل 6 شامل کی گئی، جس نے آئین میں خیالی طور پر بعض عدالتی فیصلوں کے بعد ''بنیادی سٹرکچر‘‘ کے نظریے کو مسلط کرنے کا تصور نہ صرف مسمار کیا بلکہ اسے آئین سے بے دخل بھی کر دیا۔ اسے واضح طور پر سمجھنے کے لیے آئین کا آرٹیکل 239 ذیلی آرٹیکل6 کے مطابق ''شک و شبہ دور کرنے کے لیے یہ ڈیکلیئر کیا جاتا ہے کہ پارلیمنٹ پر آئین کی کسی بھی دفعہ کو ترمیم کرتے وقت کسی حد بندی کا سامنا نہیں‘‘ یعنی

(6) For the removal of doubt ,it is hereby declared that there is no limitation whtaever on the power of the majlis-e-shoora (parliament) to amend any of the provisions of the constitutuon.]

فیصلے کے بعد عوام نے فرمائشی پٹیشنیں کرنے والے وکیلوں کے ٹولے اور رپورٹروں اور اینکرز کے اُترے ہوئے چہرے دیکھے۔ یوں لگا جیسے ان کے ہاتھ میں آیا ہوا بٹیر پِھسل کر اُڑ گیا۔ ایک بات نوٹ کر لیں آنے والے دنوں میں حکومت کے لیے چیلنج مزید بڑھ جائیں گے۔ اس لیے کہ جس لیڈرشپ میں چیلنج سے نمٹنے کی اہلیت ہی نہ ہو‘ وہ وہی کرتی ہے جو ایاز صادق نے وزیر داخلہ کے ساتھ کیا۔ پہلے نے لندن میں غداری کے الزام کا ریفرنس بنایا۔ دوسرے نے برطانیہ ٹیلیفون کر کے ترلہ پروگرام شروع کر دیا۔ دنیا کی پہلی مسلم ایٹمی ریاست کے سیاسی منیجر حسبِ ضرورت نظریۂ ضرورت بنانے والی فیکٹری ہیں۔ ایسی فیکٹری جو بحران تیار اور فروخت کرتی ہے۔

آج بجلی سے بھی کچھ تیز ہے آوازِ خطیب

آج شمشیر کی مانند قلم اُٹھے ہیں

خاکِ لاہور سے خیبر کی گزرگاہوں تک

آج پھر نغمہ سرایانِ صنم اُٹھے ہیں

روزنامہ دنیا ایپ انسٹال کریں