پیش بندی

دہشت گردی کی بیخ کنی کے لئے پاک فوج کا آپریشن ضربِ عضب جاری ہے اور سیاسی اور عسکری حلقے توقع کر رہے ہیں کہ یہ آپریشن جلد ہی اپنے منطقی انجام کو پہنچ جائے گا۔آپریشن کی مجموعی حکمتِ عملی اور اِس کے حوالے سے پیدا ہونے والی صورتِ حال کو دو مختلف زاویوں سے دیکھا جا ئے تو میر ے خیال میں آپریشن کے ضمن میں دو سطح کی منصوبہ بندی درکار تھی ۔ایک آپریشن سے متعلق سیاسی اور حکومتی سطح کی حکمتِ عملی اور دوسرے عسکری حکمتِ عملی۔ فوج یا اُس کی حکمتِ عملی دہشت گردی کے خلاف جنگ کی جزئیات میں ایک جز ہے کہ فوج کو قبائلی علاقوں میں موجود دہشت گردوں کے ٹھکانے تباہ کرنے مشن سونپ دیا گیا ۔ مشن کی تکمیل کے لئے فوج میں پالیسی سازی اور فیصلہ سازی کا ایک مربوط نظام موجود ہے جہاں معروضی حالات اور دستیاب وسائل کی روشنی میں فیصلے کئے جاتے ہیں۔ اب پاک فوج اپنے مشن کی تکمیل کے لئے جانوں کا نذرانہ پیش کرتے ہوئے پیش قدمی کر رہی ہے‘ لیکن اِس بات کا خیال رہے کہ عسکری محاذ پر فوجی کامیابی دہشت گردی کی جنگ میں حتمی کامیابی نہیں ہوگی‘ سیاسی قیادت کو آپریشن کے بعد کئی معاملات پر یک سُو ہو کر اِس جنگ کو انجام تک پہنچانا ہوگا۔

دہشت گردی کے خلاف فیصلہ کن جنگ نہ صرف بین الاقوامی اور علاقائی سطح پر ایک اہم پیش رفت ہے بلکہ یہ ملکی سالمیت اور امن و امان کے لئے بھی ایک ناگزیر فیصلہ تھا جس پر تقریباً تمام سیاسی اور عسکری قیادت یک سُو ہے۔لیکن اِس طرح کے اہمیت کے حامل آپریشن سے قبل، آپریشن کے دوران اور آ پریشن کے بعدپیدا ہونے والی صورتِ حال پر مفصل سوچ بچار اور منصوبہ بندی کی ضرورت تھی جس کا فقدان دیکھنے میں آرہا ہے۔ تین مراحل میں تکمیل پانے والے آپریشن کے پہلے دو مراحل اور اُن کے نتیجے میں پیدا ہونے والی صورتِ حال سے حکومت اور فوج نمٹ رہی ہے‘ لیکن سیاسی بالغ نظری کا مظاہرہ نہ کرنے پر کچھ منفی نتائج سامنے آئے جو تشویش کا باعث بنے۔ مثال کے طور پر اگر پیش بندی کر لی جاتی تو آئی ڈی پیز کی فوری آباد کاری جیسے بحران کا سامنا نہ ہوتا اور بے گھر ہوجانے والے لوگوں کے لئے دو صوبائی حکومتیں ہچکچاہٹ کا مظاہرہ نہ کرتیں اور شاید ماڈل ٹاؤن جیسا واقعہ بھی نہ ہوتا جِس کی وجہ سے حکومت کو آپریشن کے بعد حاصل ہونے والی سیاسی اور اخلاقی حمایت کھو دینے کا نقصان اُٹھانا پڑا۔

اب آپریشن جاری ہے اور فوج اپنے طے کئے گئے اہداف کو حاصل کر نے کے لئے مسلسل کامیابیاں حاصل کر رہی ہے۔ عسکری قیادت کو قومی اُمیدوں کا ادراک ہے اور وہ اِس کے لئے پُر عزم دکھائی دیتی ہے۔اِس وقت ضرورت اِس امر کی ہے کہ آپریشن کے بعد کی صورتِ حال اور حکمتِ عملی پر غورو خوض کیا جائے اور اِس سلسلے میں مکمل پیش بندی کی جائے۔میرے خیال میںآپریشن کے بعد تین بڑے چیلنجز کا سامنا ہو گا۔ اول‘ تقریباً دس لاکھ آئی ڈی پیز کی اپنے اپنے علاقوں میں پر امن واپسی اور آباد کاری۔ دوم‘ اِس امر کو یقینی بنانا کہ دہشت گرد دوبارہ اِن علاقوں میں منظم نہ ہو سکیں۔ سوم‘ نہ صرف آپریشن کے علاقہ میں بلکہ فاٹا میں مکمل حکومتی عمل داری کو یقینی بنانا آپریشن کے فوری بعد اہم چیلنجز ہوں گے جس کے لیے ابھی سے پالیسی تشکیل دی جانی چاہیے۔

فاٹا میں بعد از آپریشن حکومتی حکمتِ عملی کیا ہونی چاہیے‘ یہ بہت اہم سوال ہے۔ فاٹا میں مکمل حکومتی توجہ کی ضرورت ہوگی ورنہ جلد یا بدیر دہشت گرد منظم ہو سکتے ہیںاور اہم علاقے پھر دہشت گردوں کے زیرِ اثر آ جانے کا امکان رہے گا۔ آپریشن کے بعد فاٹا میں ترقی کے لیے ہنگامی حالت (Development Emergency) نافذ کر دی جائے اورجرمنی کے ترقیاتی ماڈل کو مثال بنایا جائے جہاں مغربی جرمنی نے دیوارِ برلن گرائے جانے کے بعد مشرقی جرمنی کو اپنی ترقی کی سطح پر لانے کے لئے اپنے ترقیاتی فنڈز اُس کو منتقل کردیے۔ اگر پاکستان کے تمام صوبے آئندہ دو سال کے اپنے ڈیویلپمنٹ فنڈ کا بیس فیصد فاٹا کی ترقی اور بحالی کے لئے مختص کردیں تو وہاں تیزی سے ترقیاتی کام مکمل کیے جا سکتے ہیں۔ اسی طرح اگر ملک میں دو سال کے لئے میگا پراجیکٹس روک کر رقم فاٹا میں خرچ کر دی جائے تو اِس کے بھی مثبت نتائج سامنے آئیں گے۔فاٹا میں ہر سطح پر سکول کالج اور یونیورسٹیز قائم کی جائیں کہ کیونکہ تعلیم کے فروغ سے ہی انتہا پسندانہ رویوں میں تبدیلی کا امکان ہے ۔ اِس وقت فاٹا میں پاک فوج کے تعاون سے سڑکوں کی تعمیر اور صحت کے حوالے سے بہت سے منصوبوں پر عمل ہو رہا ہے‘ ان کے لیے فنڈز میں اضافہ کیا جائے تا کہ انفراسٹرکچر کو بہتر بنایا جا سکے اور لوگوں کو صحت کی بنیادی سہولتیں بھی بہم پہنچائی جا سکیں ۔ فاٹا کو بتدریج بندوبستی علاقوں (Settled Areas) کی سطح پر لایا جائے اور اِس میںنہ صرف موجود رکاوٹوں کو دور کیا جائے بلکہ مناسب قانون سازی بھی کی جائے۔ موثر حکومتی عمل داری‘ مقامی حکومت کے نظام میں ہے‘ لہٰذا فاٹا میں مقامی سطح کی حکومتیں قائم کی جائیں جس میں پولیس، لوکل ایڈمنسٹریشن اور قانون نافذ کرنے والے اداروں کو فعال بنایا جائے۔

بعد از آپریشن پیش بندی میں اِ س امر کو مدِنظر رکھا جائے کہ آپریشن کی وجہ سے دہشت گردوں کے کمانڈ اینڈ کنٹرول سسٹم کو ناقابلِ تلافی نقصان پہنچا اور بہت حد تک اُن کی کمر ٹوٹ چکی لیکن اُن کی طرف سے بڑے پیمانے پر ردِعمل کو نظرانداز نہ کیا جائے۔ یہ بات بھی طے ہے کہ دہشت گردوں کی ایک کھیپ جو آپریشن کی زد میں نہ آسکی یا بچ نکلنے میں کامیاب ہو گئی اُن میں دوبارہ منظم ہونے کی صلاحیت ہے۔ دہشت گرد دوبارہ منظم ہونے کی کوشش کریں گے اور تنظیم نو میں یہی علاقے پھر اُن کے لئے محفوظ مقامات ثابت ہو سکتے ہیں۔ فاٹا میں فوری اور موثر اقدامات ، ترقیاتی کام، مقامی حکومت اور فعال حکومتی ادارے دہشت گردوں کی تنظیم نو کے خلاف ڈھال بن سکیں گے اور دیرپا امن کی ضمانت ہوں گے۔ اگر وہاں مقامی حکومتی ادار ے دہشت گردی کے خلاف ڈھال نہ بن سکے تواب سے چند سال بعد ہم پھر اُن حالات کی طرف واپس جا سکتے ہیں جو ہم پچھلے کئی برسوں سے دیکھ رہے تھے۔ دانش مندی صرف پیش بندی میں ہے۔