کچھ ادھر اُدھر کی اور تازہ غزل

کل خیریت دریافت کرنے کیلئے شعیب زمان کا فون آیا۔ میں فون اٹھاتے ہی کہتا ہوں کہ شکریہ بھئی‘ ٹھیک ٹھاک ہوں۔ وہ کہتے ہیں؛ سلامت رہیں اور میں فون بند کر دیتا ہوں کہ کافی سلامت رہ لیا ہے۔ اب اور کب تک سلامت رہوں‘ میں نے سلامت رہنے کا کون سا ٹھیکہ اٹھا رکھا ہے۔ اس کے بعد لندن سے علی ارمان کا فون آیا۔ کہنے لگے ؛میں نے آپ کو ڈسٹرب تو نہیں کیا؟ میں نے کہا کہ ناشتہ کر رہا ہوں‘ لیکن کوئی بات نہیں۔ آپ سنائیں کیسے ہیں؟ بولے: کیا ناشتہ کر رہے ہیں؟ میں نے کہا: یہ بتانا بھی ضروری ہے؟ بولے: پھر بھی؟ میں نے کہا: دو دیسی انڈوں کی سفیدی کا آملیٹ‘ ایک چپاتی‘ دہی اور رات کے بھگوئے ہوئے عبدالواحدی کے سات بادام۔ کہنے لگے: آپ سے بات کرنے کا مطلب تو یہ ہے کہ عمرہ کر لیا۔ میں نے کہا: پہلے تو اس پر اللہ میاں سے معافی مانگیں۔ سوری کہہ کر بتایا کہ ابھی ابھی احمد شاہ سے فون پر بات ہوئی ہے‘ آپ کی طرح وہ بھی ڈٹے ہوئے ہیں‘ وغیرہ وغیرہ۔

کل آفتاب کہہ رہے تھے کہ یہ جو موسمبیاں اور کینوں آپ نے ڈیکوریشن کی خاطر چھوڑے ہوئے ہیں‘ انہیں اتروا لینا چاہئے‘ کیونکہ ایک تو یہ نیچر کے خلاف ہے‘ دوسرے پیڑوں پر خواہ مخواہ کا بوجھ بھی۔ علاوہ ازیں‘ اس کا ایک نتیجہ یہ نکلے گا کہ اگلے سال ان پر پھل بھی کم آئے گا؛چنانچہ وہ اتروا لیے گئے۔ اس سلسلے کی ایک دلچسپ اناٹومی یہ بھی ہے کہ فارسی میں بار کے دو مطلب ہیں‘ یعنی بوجھ اور پھل؛ چنانچہ پھل درختوں پر ایک بوجھ بھی ہوتے ہیں‘ مناسب وقت پر جن سے پیڑوں کو آزاد کر دینا چاہئے۔میرؔ صاحب کا یہ شعر دیکھیے:

وقت آیا تو نخلِ دار پہ میرؔ

سر منصور ہی کا بار آیا

موسمِ بہار کا آغاز ہے اور سب سے پہلے نئے پتے شہتوت کے نکلتے ہیں‘ جو شروع میں اتنے چھوٹے ہوتے ہیں کہ لگتا ہے کہ جیسے شاخوں کا رنگ سبز ہو گیا ہے‘ جو دیکھتے ہی دیکھتے اپنا مناسب سائز اختیار کر لیتے ہیں۔ آم کے پیڑوں پر نئے پتے تو کوئی خاص نہیں آتے؛ البتہ کہیں کہیں بور آ جاتا ہے۔

قُمری کے بارے میں (ہمارا) انکشاف یہ ہے کہ جب یہ اُڑان بھرتی ہے تو اس کے پروں سے ایک موسیقی آمیز آواز نکلتی ہے۔ کبوتر کا معاملہ بھی یہی ہے‘ پھر کچھ پرندے‘ خصوصاً قمری اُڑان بھرتے وقت پہلے فضا میں ایک جست بھرتے ہیں اور پھر اپنے پر کھولتے ہیں‘ یعنی معمولی ٹیکسی کرنے کے بعد باقاعدہ ٹیک آف کرتے ہیں۔ کوّا‘ قمریوں کا پکا دشمن ہے اور اس کے انڈے پی جاتا ہے۔ کچھ عرصہ میرے واش روم کے روشن دان میں قمریوں کے جوڑے نے کچھ تنکے جوڑ کر ایک گھونسلا بنا دیا تھا اور اس میں تین چار انڈے بھی دیئے تھے‘ جو کوّے کی نذر ہو گئے۔ اب انہوں نے ایک ایسے پیڑ میںگھونسلا بنایا ہے ‘جس کا نام تو مجھے نہیں آتا‘؛البتہ اس کے پھول بگل نما زرد رنگ کے ہوتے ہیں۔ یہ اس قدر گھنا ہوتا ہے کہ کوّا اس کے اندر نہیں گھس سکتا۔ اگلے روز علی اکبر ناطق تشریف لائے اپنی نظموں کی کتاب 'ریشم بُننا کھیل نہیں‘ یہ لکھ کر پیش کی کہ ''بیسویں صدی کے سب سے بڑے شاعر جناب ظفر اقبال کیلئے‘ میں نے کہا کہ اکیسویں صدی بھی تو چل رہی ہے تو وہ بولے کہ وہ میرے لیے رہنے دیں؛ چنانچہ ہم نے کمال فیاضی کا مظاہرہ کرتے ہوئے اکیسویں صدی کو موصوف کے لیے چھوڑ دیا کہ آخر کچھ لوگوں کے لیے ایثار تو کرنا ہی پڑتا ہے۔ یہ ان کی تین کتابوں'' بے یقین بستیوں میں‘ یاقوت کے ورق اور سرمنڈل کا راجہ‘‘ کا مجموعہ ہے۔ علی اکبر ناطق کی ایک نظم دیکھیے:

ریشم بُننا کھیل نہیں

ہم دھرتی کے پہلے کیڑے ہم دھرتی کا پہلا ماس

دل کے لہو سے سانس ملا کر سُچا نور بناتے ہیں

اپنا آپ ہی کھاتے ہیں اور ریشم بُنتے جاتے ہیں

خواب نگر کی خاموشی اور تنہائی میں پلتے ہیں

صاف مصفا اُجلا ریشم تاریکی میں بُنتے ہیں

کس نے سمجھا کیسے بُنے ہیں چاندی کی کرنوں کے تار

کُنج ِجگر سے کھینچ کے لاتے ہیں ہم نور کے ذرّوں کو

شرماتے ہیں دیکھ کے جن کو نیل گگن کے تارے بھی

ہم کو خبر ہے ان کاموں میں جاں کازیاں ہو جاتا ہے

لیکن فطرت کی مجبوری ہم ریشم کے کیڑوں کی

سُچا ریشم بنتے ہیں اور تار لپٹتے جاتے ہیں