سُرخیاں‘ متن‘ درستی اور شکیلہ جبیںؔ کی شاعری

حالات ٹھیک کرنے کیلئے معجزہ چاہیے: شہباز شریف

سابق وزیراعلیٰ پنجاب میاں شہباز شریف نے کہا ہے کہ ''حالات ٹھیک کرنے کیلئے معجزہ چاہیے ‘‘اور یہ معجزہ ہم ہی دکھا سکتے ہیں ‘کیونکہ ہم لندن پہنچ کر اس قدر برگزیدہ ہو چکے ہیں کہ یہ اب ہمارے بائیں ہاتھ کا کھیل ہے ؛البتہ ہمارا دایاں ہاتھ عوام کی خدمت کرتے کرتے شل ہو چکا ہے‘ کیونکہ خدمت ہی اس مقدار میں کی گئی کہ ہاتھ کا شل ہونا تو ایک معمولی بات تھی۔ بھائی صاحب تو پہلے ہی ایک پہنچے ہوئے بزرگ تھے‘ یہاں آ کر اُن کی روحانیت کو جیسے چار چاند لگ گئے ہیں‘ اس لیے پاکستان میں قائم ہمارے خلاف تمام مقدمات اور سزائیں ختم کی جائیں اور جو ہماری جائیدادیں ضبط کی جا چکی‘ اُنہیں بحال کیا جائے ۔ آپ اگلے روز لندن میں میڈیا سے گفتگو کر رہے تھے۔

گندم اور آٹے کا بحران حکومت کی بدترین ناکامی ہے: فضل الرحمن

جمعیت علمائے اسلام (ف) کے سربراہ مولانا فضل الرحمن نے کہا ہے کہ ''گندم اور آٹے کا بحران حکومت کی بدترین ناکامی ہے‘‘ تاہم یہ میری ناکامی کا مقابلہ نہیں کر سکتی‘ کیونکہ میری ناکامی عبرت انگیز بھی ہے اور اسے مزید عبرت ناک بنانے کیلئے میں مارچ کو دوبارہ شروع

کرنے والا ہوں‘ کیونکہ عبرت مجھے خوراک کی مقدار کے مطابق ہی درکار ہوتی ہے ‘لیکن اب ایسا لگتا ہے کہ خوراک کی بجائے مجھے عبرت پر ہی گزارہ کرنا پڑے گا‘ جبکہ پیٹ بھر کر کھانا تو اب خواب ہو کر ہی رہ گیا ہے؛ حالانکہ ڈراؤنے خواب اور بھی بہت آیا کرتے ہیں کہ مارچ میں ناکامی کی صورت میں یہ جو بے توقیری ہوئی ہے‘ آئندہ الیکشن میں مجھے ووٹ کون دے گا؟ آپ اگلے روز پارٹی رہنماؤں مولانا امجد حسین‘ حافظ حسین احمد اور محمد اسلم غوری سے گفتگو کر رہے تھے۔

اِن ہاؤس تبدیلی پکی بات‘ تین ماہ میں الیکشن ہوں گے: اکرم دُرانی

جمعیت علمائے اسلام( ف) کے مرکزی رہنما اور رہبر کمیٹی کے چیئرمین محمد اکرم خاں دُرانی نے کہا ہے کہ ''اِن ہاؤس تبدیلی پکی بات‘ تین ماہ میں الیکشن ہوں گے‘‘ اور یہ بات ہمیں اپنے چیئرمین مولانا فضل الرحمن نے بتائی ہے ‘جو مارچ اور دھرنے میں ناکام ہونے کے بعد اب پیش گوئیاں بھی کرنے لگے ہیں اور ہو سکتا ہے کہ وہ اسے مستقل کاروبار کے طور پر بھی اپنا لیں‘ کیونکہ مارچ اور دھرنوں کی فضول کاموں کے بعد وہ سیاست سے تو ویسے ہی آؤٹ ہو چکے ہیں ‘بلکہ اپنے ساتھ ہمیں بھی لے ڈوبے ہیں۔آپ اگلے روز چارسدہ میں میڈیا سے گفتگو کر رہے تھے۔

درستی

جناب اعجاز احمد بُٹر نے اپنے کالم میں ایک شعر درج کیا ہے: ؎

وہی جہاں ہے ترا جسے تو کرے پیدا

یہ سنگ و حشت نہیں جو تری نگاہ میں ہیں

پہلا مصرعہ بے وزن ہو گیا ہے‘ کیونکہ اس میں لفظ ''جسے‘‘ کی بجائے ''جس کو‘‘ ہے ‘جبکہ دوسرے مصرعے کے آخر میں لفظ ہیں کی بجائے ''ہے‘‘ ہے۔

آخر میں شکیلہ جبیںؔ کے مجموعہ ''طوطا پنج رنگیا‘‘ سی حرفی کا ٹکڑا:

اکھ اپنی چوفیرے توں پھیر نی سیّو

اج اپنا توں اج ہی نبیڑ نی سیّو

متاں کل پے جوؤ تینوں گھیر نی سیّو

کوئی لَے جوؤ گا تینوں سہیڑ نی سیّو

پچھے لگے رہ جان نہ ڈھیر نی سیّو

لاڑے لیا جے تینوں چھیڑ نی سیّو