سرخیاں، متن اور ابرار احمد

لانگ مارچ ایک دن کا نہیں‘ کئی دن

ٹھہرنا پڑے گا: مولانا فضل الرحمن

سربراہ جمعیت علمائے اسلام (ف) مولانا فضل الرحمن نے کہا ہے کہ ''لانگ مارچ ایک دن کا نہیں‘ کئی دن ٹھہرنا پڑے گا‘‘ بلکہ اگر یہ کہا جائے تو کچھ غلط نہ ہو گا کہ یہ ہمیشہ کے لیے ہے، یعنی جب تک یہ حکومت اپنی میعاد پوری نہیں کر لیتی بلکہ اگر اس کی دوسری میعاد شروع ہو گئی‘ یہ تب بھی جاری رہے گا کیونکہ حکومت گرانے کے کارِ خیر کے علاوہ اور کوئی کام ہی ہمارے لیے نہیں رہ گیا جبکہ میری تو یہ اس لیے بھی شدید ضرورت ہے کہ اس بہانے دال دلیہ چلا ہوا ہے جبکہ یہ کورونا بھی جلدی جانے والا نہیں ہے، اس لیے حکومت کیخلاف یہ طویل المدتی لائحہ عمل تیار کیا گیا ہے۔ آپ اگلے روز کراچی میں صحافیوں سے بات چیت کر رہے تھے۔

مریم نواز اور شہباز کا بیانیہ الگ الگ ہے: شاہ محمود

وزیر خارجہ شاہ محمود قریشی نے کہا ہے کہ ''مریم نواز اور شہباز شریف کا بیانیہ الگ الگ ہے‘‘ اور یہ انکشاف میرے کئی روز کے گہرے غور و خوض کا نتیجہ ہے جس سے عوام اور خود حکومت کو آگاہ کر رہا ہوں اگرچہ بطورِ وزیرخارجہ یہ میرے فرائض میں شامل نہیں ہے لیکن ایک گتھی جو کسی کی سمجھ میں نہیں آ رہی تھی، میں نے اسے سلجھا دیا ہے اور بڑے فخر کے ساتھ اس راز سے پردہ اٹھا رہا ہوں جس کے لیے خصوصی داد کا طلبگار ہوں اور حکومت اضافی طور پر ایسے راز افشا کرنے کا چارج بھی مجھے دے سکتی ہے کیونکہ وزارتِ خارجہ ویسے بھی اپنے آپ ہی چل رہی ہے اور کسی قسم کی سردردی اس کے لیے درکار نہیں ہے۔ آپ اگلے روز ملتان میں میڈیا سے بات چیت کر رہے تھے۔

حکمرانوں کومہنگائی کا سونامی بنی گالا

کے پہاڑوں سے نظر نہیں آتی: شیری رحمن

پاکستان پیپلز پارٹی کی رہنما سینیٹر شیری رحمن نے کہا ہے کہ ''حکمرانوں کو مہنگائی کا سونامی بنی گالا کے پہاڑوں سے نظر نہیں آتی‘‘ حالانکہ اونچی جگہ سے ہر چیز صاف نظر آ جاتی ہے لیکن شاید دھند یا برف باری کی وجہ سے ایسا ہوتا ہو ورنہ جہاں تک میں سمجھتی ہوں حکومت کی بینائی میں کوئی خلل موجود نہیں ہے؛ تاہم اس کے لیے ایک آپشن یہ بھی موجود ہے کہ ان پہاڑوں سے نیچے اتر کر اس کا نظارہ کر سکتی ہے کیونکہ نیچے سے یہ منظر صاف نظر آ رہا ہے اور مجھے یہ سونامی کئی بار نظر آیا ہے اور اس کے زور و شور اور تیز بہائو سے میں خاصی متاثر بھی ہوئی ہوں حالانکہ میں ایسی عام چیزوں سے متاثر ہونے والی ہرگز نہیں ہوں۔ آپ اگلے روز اسلام آباد میں صحافیوں سے گفتگو کررہی تھیں۔

پیپلز پارٹی ملک کی معیشت تباہ

کرنے پر عمل پیرا ہے: شہباز گل

وزیراعظم کے معاونِ خصوصی برائے سیاسی ابلاغ ڈاکٹر شہباز گل نے کہا ہے کہ ''پیپلز پارٹی ملک کی معیشت تباہ کرنے پر عمل پیرا ہے‘‘ اور اس سے پیشتر کہ وہ اسے مکمل طور پر تباہ کر دے، وفاقی حکومت کو آگے بڑھ کر اسے بچا لینا چاہیے کیونکہ ہم یہ کام زیادہ خوش اسلوبی کے ساتھ کر سکتے ہیں، اور اسی بہانے سندھ پر حکومت کا خواب بھی شرمندۂ تعبیر ہو جائے ورنہ تعبیر کے بجائے خود ہم شرمندہ ہوتے رہیں گے اور حقیقت میں تو یہ ایک دلچسپ اور صحت مندانہ مقابلہ ہے کہ پیپلز پارٹی ہماری حکومت کو گرا کر اس پر قبضہ کرنا چاہتی ہے اور ہم سندھ کی خدمت کی فکر میں روز بروز دبلے ہوتے چلے جا رہے ہیں، اور یہ میچ کب ختم ہوگا، اس کا انتظار ہی کیا جا سکتا ہے۔ آپ اگلے روز سماجی رابطے کی ویب سائٹ کے ذریعے بیان نشر کر رہے تھے۔

امریکاکا فلیٹ میری ملکیت نہیں: آصف زرداری

سابق صدر اور پیپلز پارٹی کے رہنما آصف علی زرداری نے کہا ہے کہ ''امریکا کا فلیٹ میری ملکیت نہیں‘‘ جبکہ اسی طرح ہم نے سرے محل کی ملکیت سے بھی انکار کیا تھا لیکن وہ پُراسرار طریقے سے بعد میں ہمارا نکل آیا جس پر ہم آج تک حیران ہیں اور یہ حیرانی بھی اُس تعجب سے ملتی جلتی ہے جو یہاں بعض غریب لوگوں کو اپنے اکائونٹس میں کروڑوں، اربوں روپے پائے جانے سے ہوتی ہے اور ہو سکتا ہے کہ امریکی فلیٹ بھی کسی کرشمے کے تحت خاکسار ہی کا نکل آئے جو فی الحال میرا ہرگز نہیں ہے اور اگرچہ آج کل کرشمے نہیں ہوتے لیکن یہ سارے قدرت کے کھیل ہیں اور کسی وقت بھی کایا پلٹ سکتی ہے۔ آپ اگلے روز کراچی میں میڈیا کے سوالوں کا جواب دے رہے تھے۔

اور‘ اب آخر میں ابرار احمد کی نظم:

کچھ پتا چلتا نہیں

آبائی شہر کو جاتی گاڑی

کو دیکھتا ہوں

اس میں سوار نہیں ہوتا

اور نہ ہی ہاتھ ہلاتا ہوں

دنیا۔۔۔۔

عجیب و غریب لوگوں اور چیزوں

سے بھری پڑی ہے

میں بھی بچتا بچاتا

ان میں سے گزرتا ہوں

بغیر کسی یاد کے