بارے گھوڑوں کا کچھ بیاں ہو جائے

''دادا جان! شہر میں بہت اچھی سرکس آئی ہوئی ہے، ہمیں دکھا لائیے نا‘‘ بچوں نے کہا۔

بیٹا! تم ہی بتاؤ‘ میری عمر کوئی سرکس دیکھنے دکھانے کی ہے؟ کسی اور کو ساتھ لے جاؤ، اور اب ان سرکسوں میں آج کل رہ بھی کیا گیا ہے‘‘ دادا جان بولے۔ '

'نہیں‘ دادا جان! اس میں سنہری بالوں والی ایک حسینہ سفید گھوڑے پر کھڑے ہو کررقص کرتی ہے‘‘ ایک بچہ بولا۔

''اچھا، تم کہتے ہو تو چلا چلتا ہوں‘ مجھے بھی سفید گھوڑا دیکھے ایک زمانہ ہو گیا ہے‘‘ دادا جان بولے۔

٭......٭......٭

ایک قبائلی شادی کے بعد اپنی دلہن کو لے کر گھوڑی پر سوار گھر جا رہا تھا، راستہ پتھریلا تھا، گھوڑی نے ایک جگہ ٹھوکر کھائی تو قبائلی بولا: پہلی غلطی۔

تھوڑی دُور جا کر گھوڑی نے پھر ٹھوکر کھائی تو وہ بولا: دوسری غلطی۔ کچھ آگے جا کر گھوڑی نے پھر ٹھوکر کھائی تو قبائلی نے کہا: تیسری غلطی۔

پھر اس نے نیچے اُتر کر پستول نکالا اور گھوڑی کی کنپٹی پر رکھ کر گولی مار دی۔

یہ دیکھ کر دلہن بولی ''کس قدر ظالم ہو تم‘‘،

اس پر قبائلی بولا: پہلی غلطی!۔

٭......٭......٭

ایک صاحب اپنی گاڑی پر کسی دوسرے شہر جا رہے تھے، ابھی شہر سے کچھ دُور ہی تھے کہ ان کی گاڑی بند ہو گئی۔ وہ نیچے اُترے، بونٹ کھولا اور انجن کو اِدھر اُدھر سے دیکھنے لگے کہ آواز آئی: اس کا کاربوریٹر خراب ہے۔ انہوں نے جدھر سے آواز آئی تھی‘ اُدھردیکھا تو کوئی نہیں تھا، صرف ایک گھوڑا سڑک کے کنارے گھاس چر رہا تھا۔ وہ پھر انجن پر جھک گئے تو دوبارہ آواز آئی: میں نے کہا کہ اس کا کاربوریٹر خراب ہے،

انہوں نے جلدی سے اس طرف دیکھا تو انہیں نظر آیا کہ گھوڑے کے ہونٹ ہل رہے تھے۔ وہ اس قدر سراسیمہ ہوئے کہ گاڑی کو وہیں چھوڑا اور شہر کی طرف بھاگے۔ کچھ آگے ایک کولڈ کارنر تھا، انہوں نے اندر جا کر کچھ پینے کا آرڈر دیا تو دیکھا کہ سامنے والی میز پر دو آدمی بیٹھے چائے پی رہے تھے۔

انہوں نے ان صاحب کو پریشان دیکھ کر اس کی وجہ پوچھی تو وہ بولے: کوئی ایسی بات نہیں، لیکن جب انہوں نے اصرار کیا تو انہوں نے ساری کہانی بیان کرنا شروع کی۔ وہ سنتے جاتے اور مسکراتے جاتے اور آخری جملے پر کھلکھلا کر ہنس پڑے۔

پھر ان میں سے ایک بولا: ''ہم اُس گھوڑے کو اچھی طرح سے جانتے ہیں، وہ بکواس کرتا ہے‘ اسے گاڑی کے پرزوں کے بارے میں کچھ پتا نہیں!‘‘۔

٭......٭......٭

ایک صاحب کا گھوڑا بیمار پڑ گیا تو وہ اُسے ویٹرنری ہسپتال لے گئے۔ ڈاکٹر نے اس کا معائنہ کیا اور اُنہیں کچھ سفوف دیا۔ پوچھنے پر کہ اسے استعمال کس طرح کرنا ہے‘ ڈاکٹر نے بتایا کہ ایک نال میں یہ سفوف بھر گھوڑے کے منہ میں رکھیں اور زور سے پھونک مار دیں، ساری دوا گھوڑے کے اندر چلی جائے گی۔

کوئی نصف گھنٹے بعد وہ صاحب پھرآ گئے اُن کی آنکھیں سُرخ اور چہرے کی بھی بری حالت تھی ڈاکٹر نے وجہ پوچھی تو وہ بولے:

''گھوڑے نے پہلے پھونک مار دی!‘‘۔

٭......٭......٭

ایک بدو گھوڑے پر سوار ایک صحرا میں سے گزر رہا تھا۔ ساتھ اس کا کتا بھی تھا، گرمی کا موسم تھا اور تیز دھوپ پڑ رہی تھی کہ اس کا کتا بولا: ''ریت کس قدر گرم ہے، میرے تو پاؤں جل رہے ہیں‘‘۔

اس پر بدو نے کہا:میں تو سمجھا تھا کہ کتے باتیں نہیں کر سکتے۔ جس پر گھوڑا بولا:

''میں بھی یہی سمجھتا تھا !‘‘۔

اور‘ اب آخر میں یہ تازہ غزل:

کوئی اصلی کے مانند جعلی محبت جو تھی

ہم نے کی ہے محبت سے خالی محبت جو تھی

نہ کی ہو گی اب تک کسی نے بھی ایسی کہیں

رائگاں سی ہماری مثالی محبت جو تھی

خیالات پر ابر کی طرح چھائی رہی رات دن

بے نشاں کوئی اپنی خیالی محبت جو تھی

رنگ اپنے جماتی رہی جا بجا، سُو بہ سُو

کوئی اُس کے تغافل کی پالی محبت جو تھی

چھاؤں دیتی رہی دھوپ میں بھی‘ کسی شوخ نے