سرخیاں، متن اور افضال نوید

ہم مشرف اور ضیاء الحق سمیت کسی

کے آگے نہیں جھکے: بلاول بھٹو

چیئرمین پاکستان پیپلز پارٹی بلاول بھٹو زرداری نے کہا ہے کہ ''ہم ضیاء الحق اور مشرف سمیت کسی کے آگے نہیں جھکے‘‘ البتہ والد صاحب جب صدر تھے تو انہوں نے رخصت کرتے وقت پرویز مشرف کو 21 توپوں کی سلامی ضرور دی تھی لیکن ہم اس وقت بھی نہیں جھکے تھے بلکہ خود انہوں نے جھک کر یہ سلامی لی تھی اور اس وقت تک جھکے رہے تھے جب تک کہ اکیسواںگولا نہیں چل گیا تھا حالانکہ انہیں کہا بھی تھا کہ اتنے تکلف کی کیا ضرورت ہے‘ حتیٰ کہ وہ اکیسواں گولا چلنے کے بعد بھی اسی طرح جھکے رہے تھے اور ہماری منت سماجت پر ہی سیدھے ہوئے تھے۔ آپ اگلے روز پارا چنار میں جلسے سے خطاب کر رہے تھے۔

اپوزیشن کو 27 مارچ کے بعد سرپرائز

دیں گے: ڈاکٹر بابر اعوان

وزیراعظم کے مشیر برائے پارلیمانی امور ڈاکٹر بابر اعوان نے کہا ہے کہ ''اپوزیشن کو 27 مارچ کے بعد سرپرائز دیں گے‘‘ اگرچہ یہ سرپرائز تو اس سے پہلے دینا چاہتے تھے لیکن سرپرائز خود اس پر رضا مند نہیں ہوا جبکہ سرپرائز بھی زبردست چیز ہے کہ اس کا کہا ماننا ہی پڑتا ہے جبکہ وہ 27 مارچ کے بعد بھی اپنی مرضی ہی سے سامنے آئے گا حالانکہ جب سارا کام خراب ہو چکا ہو تو پھرسرپرائز کا فائدہ ہی کیا لیکن وزیراعظم صاحب کے پاس اس کا بھی کوئی نہ کوئی علاج ضرور ہو گا کیونکہ وہ ہر مرض کی دوا ہمیشہ اپنے پاس رکھتے ہیں‘ وہ اثر کرے یا نہ کرے۔ آپ اگلے روز اسلام آباد میں ایک انٹرویو دے رہے تھے۔

عوام حکومت کو آخری دھکا دینے کے

لیے باہر نکلیں: مولانا فضل الرحمن

جمعیت علمائے اسلام (ف) کے امیر اور پی ڈی ایم کے صدر مولانا فضل الرحمن نے کہا ہے کہ ''عوام حکومت کو آخری دھکا دینے کیلئے باہر نکلیں‘‘ کیونکہ پہلے والے تو سارے دھکے بے کار ہو چکے ہیں، اس لیے اب اس آخری دھکے سے ہی ساری امیدیں لگائے بیٹھے ہیں کہ شاید یہی کام کر جائے اور اگر اس نے بھی کام نہ کیا تو میں عوام کو یقین دلاتا ہوں کہ اس کے بعد عوام کو دھکا دینے کی زحمت نہیں دیں گے؛ تاہم اتنا یاد رہے کہ دھکا اگر دیا بھی تو یہ دیوار کہیں گرانے والوں کے اوپر ہی نہ گر پڑے اور لینے کے دینے نہ پڑ جائیں گے اور عوام کے پاس جانے کے قابل بھی نہ رہیں۔ آپ اگلے روز میڈیا سے گفتگو کرتے ہوئے عوام سے آخری درخواست کر رہے تھے۔

کپتان بھاگتا نہیں‘ بھگاتا ہے: شبلی فراز

وفاقی وزیر برائے سائنس و ٹیکنالوجی شبلی فراز نے کہا ہے کہ ''کپتان بھاگتا‘ نہیں بھگاتا ہے‘‘ اور اگر بھاگے تو پیچھا کرنے والوں کو بھی اتنا ہی بھگاتا ہے کیونکہ سیاست بھاگ دوڑ ہی کا نام ہے اور ایک دوسرے کے آگے پیچھے بھاگنے ہی میں سارا وقت صرف ہو جاتا ہے جبکہ بھاگنا حکومت کے لیے بے حد ضروری ہے اور کپتان کے اس قدر صحت مند ہونے کا راز بھی یہی ہے اور انہوں نے بھاگ بھاگ کر ہی اتنی جان بنائی ہوئی ہے کہ ان کے پیچھے بھاگنے یعنی ان کو بھگانے والے پسینے پسینے ہو کر اور تھک ہار کر بیٹھ جاتے ہیں۔ آپ اگلے روز اسلام آباد سے ایک بیان جاری کر رہے تھے۔

ہمارا جلوس گوجرانوالہ پہنچا تو عمران خان

کا استعفیٰ آ جائے گا، کیپٹن (ر) صفدر

مسلم لیگ نواز کے رہنما کیپٹن (ر) محمد صفدر نے کہا ہے کہ ''ہمارا جلوس گوجرانوالہ پہنچا تو عمران خان کا استعفیٰ آ جائے گا‘‘ اور اگر گوجرانوالہ نہ پہنچ سکا اور کسی اور طرف نکل گیا تو دوسری بات ہے کیونکہ جلوس تو جلوس ہوتا ہے، وہ اپنی مرضی یا جوش و خروش سے خود کسی طرف بھی جا سکتا ہے؛ تاہم اس صورت میں بھی استعفیٰ ضرور آئے گا اور جلوس کو نہ پا کر واپس چلا جائے گا‘ سو اس صورت میں جلوس کو استعفے کے پیچھے خود جانا پڑے گا‘ اس لیے ہمارا سب سے زیادہ زور اس بات پر ہے کہ جلوس گوجرانوالہ کے بجائے کسی اور طرف نہ جائے ورنہ ہمارے کیے کرائے پر پانی پھر جائے گا اور استعفے کا سفر بھی دگنا ہو جائے گا۔ آپ اگلے روز ماڈل ٹائون لاہور سے اسلام آباد روانگی کے وقت میڈیا سے گفتگو کر رہے تھے۔

اور‘ اب آخر میں افضال نوید کی غزل

زردئی ہجر ہے یا شعلۂ ساغر میرا

رات بھر دل پہ اچھلتا ہے سمندر میرا

تیری آواز اترتی ہے کسی ساحل پر

بھیگ جاتا ہے کسی لہر سے پتھر میرا

آبِ تنہا سے اترتی ہی نہیں شام دبیز

جا چمکتا ہے رخِ مہر میں اختر میرا

آنکھ نظارۂ نابود سے ہٹتی ہی نہیں

شہر سے ہو کے گزر جاتا ہے منظر میرا

بادِ نوخیز ٹھہرتی ہے‘ گزر جاتی ہے

اپنے ہی دھیان میں رہتا ہے صنوبر میرا

میں کسی دل کے شب و روز سے وابستہ ہوں