ایس سی او سمٹ کی میزبانی پاکستان کیلئے سنگ میل ہے ،زبیر طفیل
کراچی(این این آئی)صدریونائیٹڈ بزنس گروپ (یو بی جی)زبیر طفیل اوردیگر مرکزی رہنماؤں خالدتواب، حنیف گوہر اور۔
سید مظہر علی ناصر نے پاکستان میں ہونے والی شنگھائی تعاون تنظیم(ایس سی او)کی سمٹ کا خیرمقدم کیا، جس میں رکن ممالک کے سربراہان اور اعلیٰ سطح کے وفود شریک ہوں گے ۔یہ باوقار تقریب یوریشیا کے ممالک کے درمیان علاقائی تعاون، سفارتکاری، اور اقتصادی تعلقات کو فروغ دیتی ہے ۔ سمٹ میں ایس سی او کے آٹھ رکن ممالک اور نگران ممالک کے رہنما شریک ہوں گے ، جو علاقائی سیکیورٹی، اقتصادی تعاون، ثقافتی تبادلوں،موسمیاتی تبدیلی،توانائی کی سیکیورٹی اور دہشت گردی کے خلاف کارروائی پر بات چیت کریں گے ۔یونائٹیڈ بزنس گروپ کے رہنماؤں نے رکن ممالک کے درمیان تجارت اور سرمایہ کاری کے بہاؤ کو آسان بنانے کے لیے بینکنگ چینلز کھولنے کی اہمیت پر زور دیااورکہا کہ بینکنگ چینلز کے قیام سے لین دین میں آسانی ہوگی، لاگت کم ہوگی اور اقتصادی تعاون میں اضافہ ہوگا، جو کاروباروں اور کمیونٹیز کے لیے فائدہ مند ثابت ہوگا۔انہوں نے کہا کہ ایس سی او سمٹ کی میزبانی پاکستان کی ایس سی او کے مقاصد اور اصولوں کے ساتھ وابستگی کی توثیق کرتی ہے ۔ یہ سمٹ پاکستان کے لیے علاقائی امن، استحکام، اور مشترکہ خوشحالی میں کردار ادا کرنے کا منفرد موقع فراہم کرتی ہے ۔یو بی جی کو امید ہے کہ یہ سمٹ تجارتی اور سرمایہ کاری کے بہاؤ کو بڑھا دے گی، ثقافتی تعلقات کو فروغ دے گی، لوگوں کے درمیان تبادلے میں اضافہ کرے گی اور اقتصادی تعاون اور رابطے کے منصوبوں کو گہرائی فراہم کرے گی۔
