این ایل سی کو ڈی پی ورلڈ لاجسٹکس ایف زیڈ ای کے 60فیصد حصص کے حصول کی منظوری
کراچی (کامرس رپورٹر ) کمپی ٹیشن کمیشن آف پاکستان نے نیشنل لاجسٹک کارپوریشن (این ایل سی)کو ڈی پی ورلڈ لاجسٹکس ایف زیڈ ای کے 60 فیصد حصص کے حصول کی منظوری دے دی۔
فریقین کے درمیان حصص کی خریداری کا معاہدہ خصوصی سرمایہ کاری سہولت کونسل (ایس آئی ایف سی) کی ملک میں معاشی ترقی کے لیے جاری وسیع تر کوششوں کا مظہر ہے۔ نیشنل لاجسٹکس کارپوریشن 1978 میں قائم ہوئی۔ یہ ایک سرکاری ادارہ ہے جو نیشنل لاجسٹک کارپوریشن ایکٹ 2023 کے تحت چلایا جاتا ہے ۔ اس کا تعلق لاجسٹک، انفرااسٹرکچر اور نقل و حمل کے شعبے سے ہے اور یہ ادارہ ملکی و بین الاقوامی سطح پر مال برداری اور لاجسٹکس کی خدمات فراہم کرتا ہے ۔کمیشن کے مطابق مذکورہ معاہدے میں متعلقہ شعبے کی مارکیٹ کو روڈ فریٹ لاجسٹکس کے طور پر بیان کیا گیا ہے جس میں سڑک کے نیٹ ورک کے ذریعے سامان اور کارگو کی نقل و حمل شامل ہے ۔ جغرافیائی طور پر متعلقہ مارکیٹ کی شناخت پاکستان کے طور پر کی گئی ہے کیونکہ این ایل سی بنیادی طور پر ملک کے اندر کام کرتا ہے اور اس جوائنٹ وینچر کے تحت اس کے آپریشنز مقامی طور پر ہی ہوں گے ۔ سی سی پی کے مرجر تجزیے سے ظاہر ہوا ہے کہ اس حصول کے نتیجے میں متعلقہ مارکیٹ میں حصول کنندگان کا غلبہ نہیں ہوگا، اس لئے اس انضمام کی اجازت دے دی گئی ہے ۔ انضمام کی منظوری کا یہ فیصلہ کمپی ٹیشن کو فروغ دینے اور پاکستان میں منصفانہ کاروباری ماحول کو یقینی بنانے کے لیے کمپی ٹیشن ایکٹ 2010 کے تحت کیا گیا ہے ۔
