ڈالر کی پیش قدمی جاری، تولہ سونا 800 روپے سستا
کراچی(بزنس رپورٹر)زرمبادلہ کی دونوں مارکیٹوں میں منگل کو بھی ڈالر کی پیش قدمی جاری رہی، ادھرعالمی و مقامی مارکیٹوں میں منگل کو سونے کی قیمتوں میں کمی دیکھی گئی۔
اسٹیٹ بینک کے مطابق انٹربینک میں ڈالر 16 پیسے کے اضافے سے 280.42روپے پر جاپہنچا۔ رپورٹ کے مطابق اوپن مارکیٹ میں بھی ڈالر02پیسے کے اضافے سے 282روپے 04پیسے کا ہوگیا۔دوسری جانب عالمی بلین مارکیٹ میں سونا 6 ڈالر کی کمی سے 3021 ڈالر فی اونس کا ہوگیا۔بین الاقوامی مارکیٹ میں سونے کے نرخ میں کمی کے باعث مقامی سطح پر بھی فی تولہ سونا 800 روپے کی کمی سے 3 لاکھ 17 ہزار 800 روپے کا ہوگیا۔اسی طرح دس گرام سونے کی قیمت 686 روپے کی کمی سے 2 لاکھ 72 ہزار 462 روپے ہوگئی۔یاد رہے کہ پیر کو سونے کی فی تولہ قیمت 600 روپے کے اضافے سے 3 لاکھ 18 ہزار 600 روپے پر جاپہنچی تھی۔ دریں اثنا چاندی کی فی تولہ قیمت 3475 روپے پر مستحکم رہی۔
