گھی انڈسٹری پر سیلز ٹیکس کا سیکشن 8 بی ختم کرنے کا مطالبہ
کراچی(بزنس رپورٹر)پاکستان وناسپتی مینوفیکچررز ایسوسی ایشن کے چیئرمین شیخ عمر ریحان نے وفاقی حکومت اور وزیر خزانہ سینیٹر محمد اورنگزیب سے مطالبہ کیا ہے کہ آئندہ وفاقی بجٹ میں گھی انڈسٹری پر سیلز ٹیکس کا سیکشن 8 بی ختم کیا جائے۔۔۔
جو فی الوقت انڈسٹری سے ان پٹ لاگت کا 10 فیصد ایڈوانس میں ودہولڈ کر لیتا ہے۔ انہوں نے کہا کہ یہ شق خوردنی تیل اور گھی بنانے والی صنعت پر غیر منصفانہ طور پر لاگو کی گئی ہے۔ شیخ عمر ریحان نے کہا کہ خوردنی تیل کی انڈسٹری پر پہلے ہی بے تحاشہ ٹیکسز کا بوجھ ہے جس سے پیداواری لاگت میں بہت زیادہ اضافہ ہو چکا ہے جس کی انڈسٹری متحمل نہیں۔ چیئرمین پی وی ایم اے نے مزید کہا کہ سیلز ٹیکس ریفنڈز کی مد میں گھی انڈسٹری کے اربوں روپے ایف بی آر کے پاس پھنسے ہوئے ہیں جن کی فوری ادائیگی اشد ضروری ہے تاکہ مینوفیکچررز کو درکار سرمایہ مہیا ہو سکے ۔ انہوں نے کہا کہ اگر ریفنڈز کی ادائیگی بروقت ہو جائے تو گھی انڈسٹری کو بینکوں سے مہنگے قرضے لینے کی ضرورت نہیں پڑے گی، جس سے پیداوار کی لاگت میں کمی آئے گی اور اسکا براہ راست فائدہ عوام کو گھی و کوکنگ آئل کی قیمتوں میں کمی کی صورت میں ملے گا۔
