مضر صحت اشیاء فروخت کرنیوالوں کیخلاف کارروائیاں جاری
چنیوٹ(ڈسٹرکٹ رپورٹر )پنجاب فوڈ اتھارٹی چنیوٹ کی ٹیمیں اتوار کوتعطیل کے باوجود فیلڈ میںمضر صحت اشیاء کا کاروبار کرنیوالوں کیخلاف کارروائیاں کرتی رہیں۔
تفصیلات کے مطابق چنیوٹ اور گردونواح میں پنجاب فوڈ اتھارٹی کے ڈپٹی ڈائریکٹر آپریشنز ڈاکٹر محمد قاسم رضا کی سربراہی میں ٹیموں نے گزشتہ روز کارروائیوں کے دوران صفائی ستھرائی کے ناقص انتظامات اور میڈیکل سرٹیفکیٹ نہ ہونے پر مختلف فوڈ پوائنٹس،سویٹس اینڈ بیکرز اور آئس فیکٹری کو بھاری جرمانے عائد کر دیئے ۔علاوہ ازیں شہر بھر میں 60 فوڈ بزنسز کی چیکنگ کی گئی اور اصلاحاتی نوٹسز جاری کرنے کے ساتھ ساتھ قوانین پر عملدرآمد نہ کرنے والے دکانداروں کو 75ہزار روپے کے جرمانے کئے ۔اسی طرح200 لٹر سے زائد حشرات زدہ آئس واٹر،10 لٹر جلے تیل اور 10 لٹر حشرات زدہ شیرہ کو موقع پر ضائع کرادیا گیا۔ فوڈ سیفٹی ٹیموں نے معیاری خوراک کی فراہمی کے مشن کے تحت شہر بھرمیں آئس فیکٹریز کی معائنہ مہم شروع کر رکھی ہے ۔ادھر گندے فلٹرز اور زنگ آلود سانچوں کے استعمال کے ساتھ ساتھ صفائی کے ناقص انتظامات کی بنا پرمتعدد آئس فیکٹریز کو 56ہزار روپے کے جرمانے اور 400 لٹر برف بنانے کے لئے استعمال ہونے والا ناقص حشرات زدہ پانی ضائع کرادیا گیا۔
