واٹر ٹریٹمنٹ پلانٹ پراجیکٹ پر جلد کام شروع ہو گا:سہیل قادر چیمہ
فیصل آباد(سٹاف رپورٹر)منیجنگ ڈائریکٹر واسا سہیل قادر چیمہ نے کہا ہے کہ ایسٹرن ویسٹ واٹر ٹریٹمنٹ پلانٹ پراجیکٹ کے ابتدائی تمام مراحل مکمل ہو چکے ہیں اور آئندہ ایک ہفتے میں لون ایگریمنٹ پر دستخط ہونے کے بعد پراجیکٹ پر باضابطہ طور پر کام کا آغاز کر دیا جائے گا۔
ان خیالات کا اظہار انہوں نے پراجیکٹ مینجمنٹ یونٹ کے اجلاس کی صدارت کرتے ہوئے کیا۔ اس موقع پر ڈپٹی منیجنگ ڈائریکٹر سروسز اکرام اللہ چودھری، پراجیکٹ ڈائریکٹر کامران رضا کاہلوں، ڈپٹی ڈائریکٹر فیضان شکور اور پی ایم یو کے دیگر افسر بھی موجود تھے ۔ ایم ڈی واسا سہیل قادر چیمہ نے مزید کہا کہ ویسٹ واٹر ٹریٹمنٹ پلانٹ پراجیکٹ فیصل آباد کے شہریوں کیلئے کسی تحفہ سے کم نہیں کیونکہ پراجیکٹ مکمل ہونے کے بعد شہریوں کو ماحولیاتی آلودگی سے نجات ملے گی۔ انہوں نے واضح کیا کہ پراجیکٹ کے تعمیراتی کاموں کے لئے کنٹریکٹرز کی سلیکشن ہو چکی ہے جبکہ یہ پراجیکٹ فارن فنڈنگ سے مکمل کیا جائے گا اس لئے تعمیراتی کاموں کے دوران کوالٹی پر کوئی سمجھوتہ نہ کیا جائے جبکہ منصوبے کے تعمیراتی کاموں کو مقرر کردہ ٹائم لائن کے مطابق مکمل کیا جانا چاہئے ۔ ایم ڈی واسا سہیل قادر نے مزید کہا کہ ڈنمارک کے تعاون سے ویسٹ واٹر ٹریٹمنٹ پلانٹ کا میگا پراجیکٹ عوامی فلاح کا انقلابی منصوبہ ہے کیونکہ دنیا بھر میں فضائی اور ماحولیاتی آلودگی کے چیلنجز سے نمٹنے کیلئے اقدامات کئے جارہے ہیں۔
