گجرات میں نئی انڈسٹریل اسٹیٹ کے قیام کا فیصلہ
گجرات(سٹی رپورٹر ، نامہ نگار )صوبائی وزیر صنعت و تجارت چودھری شافع حسین کی زیر صدارت محکمہ صنعت وتجارت کے کمیٹی روم میں اجلاس منعقد ہوا جس میں پنجاب کی 23 سمال انڈسٹریل اسٹیٹس کی کالونائزیشن اور ترقیاتی امور کا جائزہ لیا گیا۔
اجلاس میں گجرات میں نئی انڈسٹریل اسٹیٹ بنانے کا فیصلہ کیا گیا،نئی انڈسٹریل اسٹیٹ غیر زرعی اراضی پر بنے گی۔صوبائی وزیر نے گجرات کی ضلعی انتظامیہ کو آئندہ چار روز میں مناسب زمین کی نشاندہی کی ہدایت دیتے ہوئے کہا کہ انڈسٹریل اسٹیٹ کے لئے ایسی جگہ تلاش کی جائے جہاں بجلی کی ٹرانسمشن لائن اور گیس پائپ لائن قریب ہو۔انہوں نے کہا کہ گجرات میں نئی انڈسٹریل اسٹیٹ بننے سے صنعتکاروں کو سہولت ملے گی اور معاشی سرگرمیاں بڑھیں گی۔ صوبائی وزیر نے کہا کہ پنجاب میں نئے کارخانے لگنے سے روزگار کے نئے مواقع پیدا ہوں گے ،حکومت صوبے میں صنعتکاری کے عمل کو تیز کرنے کیلئے موثر حکمت عملی پر عمل پیرا ہے ۔ایم ڈی پیسک سدرہ یونس،سینئر اکنامک ایڈوائزر جاوید اقبال، محکمہ آبپاشی کے افسروں نے اجلاس میں شرکت کی جبکہ اے ڈی سی آر گجرات وڈیو لنک کے ذریعے اجلاس میں شریک ہوئے ۔
