جعلی زرعی ادویات بیچنے پر ایکشن لیا جائے گا:محمد ذوالقرنین
سیالکوٹ (نمائندہ دنیا ،ڈسٹرکٹ رپورٹر) ڈپٹی کمشنر محمد ذوالقرنین نے کہا کہ زگ زیگ ٹیکنالوجی کے بغیر چلنے والے بھٹہ خشت کے خلاف مؤثر کارروائی یقینی بنائی جائے گی۔
جعلی زرعی ادویات، کھاد فروخت کرنے والوں، ناجائز منافع خوروں کے خلاف بلا تفریق ایکشن لیا جائے گا، ان خیالات کا اظہار انہوں نے سرکاری محکموں کی کارکردگی کے جائزہ اجلاس اور پرائس کنٹرول مجسٹریٹس کے اجلاس سے خطاب کرتے ہوئے کیا، اے ڈی سی فنانس مظفر مختار،اے ڈی سی جی سید اسد رضا کاظمی، اے سے سیالکوٹ انعم بابر ، مختلف محکموں کے ضلعی سربراہان بھی موجود تھے ۔ ڈپٹی کمشنر محمد ذوالقرنین نے کہا کہ انسداد سموگ مہم کے تحت ضلع میں بھٹہ خشت کی انسپکشن کیلئے ٹیموں کو متحرک کیا گیا ہے ، ماحولیاتی آلودگی کا باعث بننے والے 32بھٹہ خشت سیل کئے جاچکے ہیں، 14کے مالکان کے خلاف مقدمات درج کرائے گئے ہیں اور سات لاکھ روپے جرمانہ عائد کیا گیا ہے ، جعلی کھاد فروخت کرنیوالے 5، جعلی زرعی ادویات فروخت کرنے والے 10ملزمان کے خلاف مقدمات درج کرائے گئے ہیں۔ انہوں نے بتایا کہ مین ہولز کور کرنے کیلئے میونسپل کمیٹیوں کو ہدایات جاری کر دی گئی ہیں، روزانہ کی بنیاد پر خراب سٹریٹ لائٹس کی مرمت کی جارہی ہے اسی ایس او پیز کو مد نظر رکھتے ہوئے طرح آوارہ کتوں کو تلف کیا جارہا ہے۔
