حافظ آباد:جگہ جگہ کوڑے کے ڈھیر ، گٹر ابلنے لگے
حافظ آباد(نامہ نگار،نمائندہ دنیا )مساجد کے شہر حافظ آباد میں صفائی ستھرائی کے مسائل گھمبیر ہونے لگے ، گلی محلوں میں جگہ جگہ کوڑا کرکٹ کے ڈھیر لگ گئے ۔ گٹراور نالیاں ابلنے سے مکینوں کا گھروں سے نکلنا محال ہوگیا۔
صفائی ستھرائی کا ٹھیکہ نجی کمپنی کوملنے بعد شہر کے اکثر گلی محلوں میں صفائی کی ابتر صورت حال نے شہریوں کو پریشان کرکے رکھ دیا۔ نجی کمپنی مطلوبہ سینٹری ورکرز بھرتی نہ کرسکی اور نہ ہی مطلوبہ مشینری خرید سکی۔شہر میں دن بدن صفائی کی ابتر صورت حال نے وزیر اعلیٰ کے ستھرا پنجاب کو غلاظت سے زدہ پنجاب بنادیا ۔ اکثر علاقوں میں کوڑے کرکٹ اور سیوریج کا نظام ابتر ہونے سے تعفن پھوٹ رہا ہے اور شہری سخت سردی کے موسم میں خطرناک امراض میں مبتلا ہو رہے ہیں۔ شہریوں نے صفائی ستھرائی کی ابتر صورت حال پر شدید احتجاج کرتے ہوئے کمشنر گوجرانوالہ اور دیگر تمام ذمہ داروں سے مطالبہ کیا ہے کہ مساجد کے شہر حافظ آباد کو گندگی اور جوہڑ میں تبدیل ہونے سے بچایا جائے ۔
