غیر قانونی پارکنگ:کارروائیوں کیلئے سپیشل سکواڈ تشکیل
اسلام آباد (خصوصی رپورٹر) اسلام آباد ٹریفک پولیس نے ٹریفک کا بہاؤ برقرار رکھنے، ٹریفک نظام بہتر کرنے اور ٹریفک قوانین پر عملدرآمد یقینی بنانے کیلئے خصوصی اقدامات کا آغاز کر دیا ہے۔
اس سلسلے میں نو پارکنگ کی خلاف ورزی اور فٹ پاتھ پر غیر قانونی پارکنگ کرنے والے ڈرائیوروں کے خلاف بلاتفریق کارروائیوں کا سلسلہ جاری ہے، اسلام آباد ٹریفک پولیس نے شہر کے شاپنگ مالز، مارکیٹس، تجارتی مراکز اور بڑی شاہراہوں پر غیر قانونی پارکنگ کے خلاف کریک ڈاؤن جاری رکھتے ہوئے سپیشل سکواڈ بھی تشکیل دیئے ہیں۔ چیف ٹریفک آفیسر نے تمام زونل ڈی ایس پیز کو خصوصی ہدایت کی کہ ٹریفک قوانین کی خلاف ورزیاں کم کرنے کیلئے قوانین پر سختی سے عملدرآمد یقینی بنایا جائے اور ٹریفک ڈسپلن متاثر کرنے والے عناصر کے خلاف بلاامتیاز کارروائی کی جائے اور شاپنگ سنٹرز میں نوپارکنگ کی خلاف ورزی کرنے والوں کو رعایت نہ دی جائے، فٹ پاتھ پیدل چلنے والوں کا حق ہے فٹ پاتھ پر کسی قسم کی پارکنگ یا رکاوٹ برداشت نہیں کی جائے گی، تجارتی مراکزمیں آنے والے شہریوں کو ہر ممکن سہولیات فراہم کی جائیں گی،شہری بھی قانون کی پاسداری کریں۔
