گمراہ کن اشتہار پر برٹش لائسیئم پر 50 لاکھ روپے جرمانہ عائد
اسلام آباد(دنیا رپورٹ ) کمپٹیشن کمیشن آف پاکستان نے آن لائن ٹیوشن کمپنی، میسرز برٹش لائسیئم (پرائیویٹ) لمیٹڈ پر گمراہ کن اشتہار شائع کرنے پر پچاس لاکھ روپے کا جرمانہ عائد کیا ہے ۔
اشتہار میں دعویٰ کیا گیا تھا کہ اس آن لائن پلیٹ فارم پر بطور ٹیچر رجسٹر ہو کر اساتذہ ماہانہ 2 لاکھ 50 ہزار روپے تک کما سکتے ہیں۔ اشتہار میں \"کیمرج گلوبل یو کے \" کے ساتھ الحاق کا دعویٰ بھی کیا گیا، جو کہ ایک غیر فعال ادارہ ہے ۔ مزید برآں، یہ بھی کہا گیا کہ معروف ماہرین تعلیم اور ٹیکنالوجی بورڈ آف ڈائریکٹرز کمپنی کے ساتھ کام کر رہے ہیں۔ ان دعوؤں سے متعلق شکایات موصول ہونے پر کمپٹیشن کمیشن نے تحقیقات کا آغاز کیا۔ تفتیش میں ان تمام دعوؤں کو جھوٹا، غیر مصدقہ اور گمراہ کن قرار دیا گیا۔ کمیشن نے کمپٹیشن ایکٹ کی دفعہ 10(2)(ب) کے تحت صارفین کو گمراہ کرنے پر 30 لاکھ روپے اور دفعہ 10(2)(ا) کے تحت دیگر کاروباری اداروں کو نقصان پہنچانے پر 20 لاکھ روپے جرمانہ عائد کیا ہے ۔
