ایس ایس پی انویسٹی گیشنز کا اردل روم،افسروں کے مسائل سنے
سنگین نوعیت کے معاملات پر متعلقہ افسران کو ازسرنو انکوائریاں مکمل کرنیکی ہدایت
اسلام آباد (خصوصی رپورٹر) ایس ایس پی انویسٹی گیشنز عثمان بٹ نے اسلام آباد پولیس کے افسران کو درپیش محکمانہ اور ذاتی نوعیت کے مسائل کے بروقت اور ترجیحی بنیادوں پر حل کو یقینی بنانے کیلئے اپنے دفتر میں اردل روم کا انعقاد کیا، پولیس افسران نے ذاتی اور سرکاری نوعیت کے مسائل سامنے رکھے، انہوں نے سنگین نوعیت کے معاملات پر متعلقہ پولیس افسران کو ازسرنو انکوائریاں مکمل کرنے کی ہدایت کی جبکہ پولیس افسران کے باقی مسائل کو ترجیحی بنیادوں پر مکمل کرنے کیلئے موقع پر ہی افسران کو احکامات جاری کئے۔ اس موقع پر انہوں نے کہا کہ پولیس افسران و ملازمین کی ویلفیئر کیلئے متعدد اقدامات کئے گئے ہیں جن میں رہائش، بہترین طبی سہولیات اور تعلیم کے معیار کو بہتر بنانا شامل ہیں۔ اردل روم کے انعقاد کا مقصد پولیس افسران کی ویلفیئر، ذاتی و سرکاری مسائل کو ترجیحی بنیادوں پر حل کرنے کے ساتھ ان کے مورال کو بلند کرنا ہے۔
