لنگر خانوں کے بجائے کارخانوں کو ترجیح دینا ہوگی،شہلا رضا
لوگوں کیلئے باعزت روزگار کے زیادہ سے زیادہ موقع پیدا کرنے ہوں گے ، صوبائی وزیر
کراچی (اسٹاف رپورٹر) صوبائی وزیر ترقی نسواں شہلا رضا نے کہا ہے کہ پاکستان ایک فلاحی ریاست ہے ، تاہم ہمیں ملک میں لنگر خانوں کے بجائے کارخانے لگانے کو ترجیح دینا اور لوگوں کیلئے باعزت روزگار کے زیادہ سے زیادہ موقع پیدا کرنے ہوں گے۔ ان خیالات کا اظہار انہوں نے \"Cure Pakistan Welfare\" کے تحت پانچویں \"Grand Mall of Smiles\" کی تقریب میں بطور مہمان خصوصی خطاب کے دوران کیا۔ انہوں نے مزید کہا کہ یہ تقریب اس لیے منفرد ہے کہ اس میں شریک یتیم بچوں کی ضروریات کو مدنظر رکھتے ہوئے انہیں ضروری اشیا مفت فراہم کی گئیں۔ صوبائی وزیر ترقی نسواں شہلا رضا نے کہا کہ وہ لوگ قابل تحسین ہیں جو بڑھ چڑھ کر ایسے کارخیر میں حصہ لیتے ہیں اور یتیم و بے سہارا بچوں کے چہروں پر مسکراہٹیں بکھیرنے کا سبب بن رہے ہیں۔ انہوں نے کہا کہ ہمیں اس بات کو بھی یقینی بنانا ہو گا کہ یتیم خانوں میں داخل بچے بہتر تعلیم و تربیت حاصل کریں، معاشرے میں اپنا نمایاں مقام و اہمیت بنائیں اور ملک و قوم کی ترقی میں اپنا کردار ادا کریں۔ صوبائی وزیر شہلا رضا نے کیور پاکستان ویلفیئر کی کاوش کو سراہتے ہوئے انتظامیہ کو پروگرام کے کامیاب انعقاد پر مبارک باد بھی پیش کی۔ صوبائی وزیر شہلا رضا نے یتیم بچوں میں تحائف بھی تقسیم کیے۔
