اسٹریٹ کرائمز میں کم عمر بچے استعمال کرنے کا انکشاف
کراچی(آئی این پی)گارڈن پولیس کے ہاتھوں گرفتار بلال ٹینشن گروپ کے 2 کارندوں نے تفتیش کے دوران اہم انکشافات کیے ہیں۔
تفصیلات کے مطابق گارڈن پولیس کے ہاتھوں گرفتار بلال ٹینشن گروپ کے 2 کارندوں نے تفتیش میں اعتراف کیا کہ ان کا گروہ میں 10 سے 12کارندوں پر مشتمل ہے ، تمام ملزمان افغان باشندے ہیں اور افغانستان آتے جاتے رہے ہیں۔پولیس نے بتایا کہ گروہ نے ایم پی آر اسلامیہ کالونی کی پہاڑی پر ٹھکانہ بنایا ہوا تھا جہاں انہوں نے کم عمر بچوں کو پولیس، رینجرز کی نگرانی پر رکھا ہوا تھا، بچے ملزمان کو پولیس، رینجرز کی آمد و رفت کی اطلاع دیتے تھے ۔پولیس کا کہنا ہے کہ ملزمان صبح کے اوقات میں مختلف علاقوں میں واردات کرتے تھے ان کا زیادہ تر نشانہ طلبہ اور آفس جانے والے افراد ہوتے تھے ، گروہ روزانہ کی بنیاد پر 20 سے 25 موبائل چھینتا تھا۔ملزمان نے پولیس کے سامنے اعتراف کیا کہ 100 موبائل جمع ہونے پر پیک کر کے بس میں سوات بھجوائے جاتے تھے ، پھر وہاں سافٹ ویئر انجینئر ملزم حسین اور اس کے بھانجے کو بیچے جاتے تھے ۔
پولیس نے بتایا کہ گروہ میں شامل سہولت کار ملزم حسین کی سوات میں موبائل شاپ ہے ، ملزم حسین موبائل فون کے آئی ایم ای آئی نمبر تبدیل کر کے اسے مہنگے داموں میں بیچتا تھا۔پولیس نے بتایا کہ ملزمان تھانہ پریڈی کی حدود میں جیولری شاپ میں ڈکیتی میں ملوث ہیں اس کے علاوہ 16 مئی کو منگھو پیر میں ماربل فیکٹری میں بھی واردات کی تھی۔پولیس نے مزید بتایا کہ گروہ نے 10 اکتوبر کو پیرآباد میں پولیس پارٹی پر فائرنگ کی تھی، پولیس نے مقابلے کے بعد 2 ملزمان بلال ٹینشن اور ذیشان کو گرفتار کیا تھا، فائرنگ کے تبادلے کے بعد ملزم نعمت اللہ فرار ہوگیا تھا۔دوسری جانب تیموریہ پولیس نے خفیہ اطلاع پر کارروائی کرتے ہوئے اسٹریٹ کرائم کی درجنوں وارداتوں میں مطلوب ملزمان کوگرفتار کرلیا،گرفتار ملزمان کے قبضے سے ناجائز اسلحہ سمیت گذشتہ روز حیدری مارکیٹ کی حدود سے چھینا ہوا موبائل فون اور دیگر سامان برآمد کرلیا،گرفتار ملزمان کی شناخت وقار ولد محمد ایوب اور ہاشم ولد ممتاز کے ناموں سے ہوئی،دورانِ گرفتاری ملزمان کے قبضے 2 عدد TT پسٹل 30 بور لوڈ میگزین، حیدری مارکیٹ کی حدود سے چھینا ہوا 1 عدد موبائل فون مالیت 4 لاکھ ،شناختی کارڈ، ڈرائیونگ لائسنس، سروس کارڈ اور موٹر سائیکل برآمد ہوئی،گرفتار ملزمان نے دورانِ انٹیروگیشن انکشاف کیا کہ گذشتہ روز مورخہ 9 دسمبر کو حیدری مارکیٹ کی حدود بلاک H میں ایک پیدل جاتے ہوئے شہری سے یہ سامان اسلحے کے زور پرچ ھینا تھا۔
