جامعہ کراچی اور اے بی ایم کے مابین مفاہمتی یادداشت پر دستخط
کراچی (اسٹاف رپورٹر)جامعہ کراچی کے ڈاکٹر اے کیوخان انسٹی ٹیوٹ آف بائیوٹیکنالوجی اینڈجینیٹک انجینئرنگ (کبجی) اور ایسوسی ایشن آف بائیورسک مینجمنٹ(اے بی ایم)پاکستان کے مابین مفاہمتی یادداشت پر دستخط کی تقریب پیر کو منعقد ہوئی۔
مفاہمتی یادداشت پر جامعہ کراچی کے وائس چانسلر پروفیسرڈاکٹر خالد محمودعراقی اور ایسوسی ایشن آف بائیورسک مینجمنٹ کے ایگزیکٹوڈائریکٹر ڈاکٹر اصغرعلی نے دستخط کئے ۔مفاہمتی یادداشت کے مطابق ایسوسی ایشن آف بائیورسک مینجمنٹ کبجی جامعہ کراچی لیبارٹریز کو بائیوسیفٹی اور بائیوسیکیورٹی کے حوالے سے باقاعدہ تکنیکی مددفراہم کرنے کے ساتھ لیب کے عملے اور فیلڈ اسٹاف کوبائیوسیکیورٹی اور بائیوسیفٹی میں تربیت فراہم کرے گی اور تربیت کی تکمیل پر بائیوسیفٹی کٹس بھی فراہم کریں گے ۔جامعہ کراچی اور اے بی ایم باہمی اشتراک سے تربیتی ورکشاپس،سیمینارزاور بائیوسیفٹی، سیکیورٹی کو یقینی بنانے کے لئے لیبارٹریز پروٹوکول کو یقینی بنانے کیلئے اقدامات اور تربیت فراہم کرے گی۔اس پروگرام کا مقصد آزادکشمیر، خیبرپختونخوا، پنجاب، سندھ اور بلوچستان میں موجود لیبارٹریوں میں بائیو سیفٹی اور بائیو سیکیوریٹی کے طریقوں کو متعارف کروانا اور مضبوط بنا کر زونوٹک پیتھوجینز کو کنٹرول کرنا ہے ۔ ڈاکٹر خالدمحمود نے بتایا کہ جامعہ کراچی لیبز میں بائیورسک مینجمنٹ کی اہمیت اور فوائد کو پھیلانے کے حوالے سے سندھ کی دیگرجامعات کی رہنمائی اور مدد کرے گی۔
