بیوی سے پریشان ہو کر خودکشی کا ڈرامہ کرنے والا شوہر زیر حراست
کراچی (این این آئی) سی ویو پر خودکشی کا ڈرامہ رچانے والا شہری منظرعام پر آگیا، دو شادیاں کرنے والے شہری نے اپنی ایک بیوی کو ڈرانے کے لیے ڈرامہ رچایا تھا۔ بدھ کو طاہر محمود منظرعام پر آگیا ۔۔
جسے شاہ فیصل کالونی پولیس نے اسے تحویل میں لے لیا۔شہری طاہر محمود نے میڈیا سے گفتگو میں بتایا کہ گھریلو ناچاقی کی بنا پر ڈرامہ رچا رہا تھا گھٹنوں گھٹنوں پانی میں جاکر اپنی اہلیہ کو ویڈیو کال کی تھی اوراہلیہ سے کہا کہ میں خودکشی کر رہا ہوں ، اہلیہ نے کہا میری حالت خراب ہو جائے گی، میں نے فون بند کردیا۔طاہر نے بتایا کہ گھر میں کھانے پکانے پر اہلیہ سے تلخ کلامی ہوئی تھی اور غصے میں آکر گھر سے چلا گیا تھا، وہ صرف گھر والوں کو ڈرانا چاہتا تھا اسی دوران چار افراد نے وہاں آکر مجھے نام سے پکارا میں نے پلٹ کر دیکھا تو مجھے کچھ سنگھایا اور میں بے ہوش ہوگیا جب ہوش آیا تو ناظم آباد میں تھا، میری ٹانگوں میں کچھ زخم بھی تھے ، میں پیدل صبح سویرے شاہ فیصل کالونی میں گھر پہنچا۔
