پولیس کی ناقص تفتیش اور ملزموں کی عدم گرفتاری پر عدالت برہم،مال مسروقہ برآمد کرنے کا حکم
کراچی(اسٹاف رپورٹر)سندھ ہائیکورٹ نے مختلف کیسز میں پولیس کی ناقص تفتیش اور ملزموں کی عدم گرفتاری پر اظہار برہمی کرتے ہوئے مال مسروقہ کی برآمدگی کو یقینی بنانے کا حکم دے دیاہے ۔عدالتی حکم پر ایڈیشنل آئی جی جاوید عالم اوڈھو عدالت میں پیش ہوئے ۔
ملزموں کی گرفتاری سے مقدمے کے اندراج تک قانونی طریقہ کار پر عملدرآمد نہ کرنے پر عدالت نے اظہار برہمی کرتے ہوئے کہاکہ گرفتار ملزموں کی بروقت شناخت پریڈ کا عمل یقینی بنایاجائے ،مقدمے کے اندراج اور طے کردہ طریقہ کار پر عملدرآمد نا کرنے کا فائدہ ملزموں کو ہوتا ہے ،جاوید عالم اوڈھو نے موقف اختیارکیا کہ ہم مفرور ملزموں کی گرفتاری کے لیے کوششیں کریں گے ،جسٹس امجد علی سہتو کاکہناتھا کہ جس چیز پر پابندی کا حکم دیتے ہیں اسکا ماہانہ ریٹ بڑھ جاتا ہے ،گٹکے پر پابندی کا حکم دیا تو اس پر بھی پولیس کا ماہانہ نرخ بڑھ گیا ،ایل پی جی اور ناقص سلنڈرز پر پا بندی کا حکم دیا اس پر بھی پولیس کا ماہانہ نرخ بڑھ گیا ،پولیس صرف غیر قانونی کاموں میں ملوث افراد سے پیسے کی وصولی میں لگی ہوئی ہے ،مقدمہ درج ہونے کے بعد ملزموں کو گرفتار کرنے کے بجائے مفرور قرار دے کر چالان جمع کرادیا جاتا ہے ،دس کیسز سامنے پڑے ہیں، اب ملوث ملزم چھوڑ دیں یا بے قصور جیل میں رکھیں ۔علاوہ ازیں سندھ ہائیکورٹ نے کراچی لائے جانے والے جانوروں پر ہیلتھ ٹیکس کے خلاف درخواست پر کے ایم سی و دیگر متعلقہ حکام کو نوٹس جاری کرتے ہوئے فریقین سے 16 اگست تک جواب طلب کرلیا۔
