گاڑیوں کی پریمیم نمبر پلیٹس کی آن لائن بولی کااعلان
کراچی(مانیٹرنگ ڈیسک)محکمہ ایکسائز سندھ نے پریمیم نمبر پلیٹس کی آن لائن بولی شروع کرنے کا اعلان کردیا۔سندھ کے سینئر وزیر شرجیل انعام میمن نے کہا ۔۔
کہ پلاٹینم ، گولڈ اور سلور کیٹیگریز میں نمبر پلیٹس پر اب آن لائن بولی لگائی جا سکے گی، آن لائن بولی کا مقصد صوبے میں سیلاب متاثرین کے گھروں کی تعمیر کیلئے فنڈز اکٹھا کرنا ہے ۔محکمہ ایکسائز کے اجلاس میں گفتگو کرتے ہوئے شرجیل میمن نے کہا کہ پریمیم نمبر پلیٹس کیلئے خصوصی پورٹل متعارف کرایا جائیگا،شرکاء پلاٹینم، گولڈ اور سلور کیٹیگریز میں پریمیم نمبر پلیٹس پر بولی لگا سکیں گے ۔ خواہشمند افراد کومقررہ مدت کے اندر آن لائن بولی کے ذریعے پریمیم پلیٹس حاصل کرنے کا موقع ملے گا۔انہوں نے کہا کہ 12 اکتوبرکو کراچی میں ایک بڑے فنڈ ریزنگ ایونٹ کی منصوبہ بندی بھی کی گئی ہے ، فنڈ ریزنگ ایونٹ میں پریمیم اور پرسنلائزڈ نمبر پلیٹس پر بولی لگائی جائے گی۔شرجیل میمن کی زیر صدارت ہونے والے اجلاس میں منشیات کے خلاف ڈیوٹی میں غفلت برتنے والے افسران اور ملازمین کے خلاف بھی سخت کارروائی کا فیصلہ کیا گیا۔انہوں نے کہا کہ معاشرے کو منشیات سے پاک کرنے کیلئے منشیات کے خلاف کارروائیوں میں مزید تیزی لائی جائے ، منشیات کے خلاف مستحکم کارروائیوں کیلئے پولیس سے مزید فورس لی جا سکتی ہے۔
