ٹنڈو محمد خان کا ماسٹر پلان پیش، سفارشات شامل کرنے کافیصلہ
ٹنڈو محمد خان (نمائندہ دنیا) ڈائریکٹوریٹ آف اربن اینڈ ریجنل پالیسی اینڈ اسٹریٹجک پلاننگ، پلاننگ اینڈ ڈولپمنٹ ڈپارٹمنٹ حکومت سندھ نے ٹنڈو محمد خان کے ترقیاتی ماسٹر پلان پر عوامی نمائندوں کے ساتھ ڈسٹرکٹ کونسل ہال میں مشاورتی سیمینار منعقد کیا۔
سیمینار میں وزیر اعلیٰ سندھ کے معاون خصوصی اور چیئرمین ڈسٹرکٹ کونسل سید قاسم نوید قمر،ایم پی اے سید اعجاز شاہ بخاری،ایم پی اے خرم کریم سومرو اور دیگر معززین نے شرکت کی۔شرکاء نے ٹنڈو محمد خان ٹاؤن کے ماسٹر پلان کے حوالے سے محکمہ پی اینڈ ڈی کی کاوشوں کو سراہا اور اپنی تجاویز دیتے ہوئے کہا کہ ماسٹر پلاننگ پائیدار ترقی کے لیے عالمی سطح پر تسلیم شدہ حکمت عملی ہے ۔ شہروں کو ‘‘ترقی کا انجن ’’ سمجھا جاتا ہے اور ان کی صلاحیت سے فائدہ اٹھانا پاکستان جیسے ترقی پذیر ممالک کی پائیدار اقتصادی ترقی کے لیے کلیدی حیثیت رکھتا ہے ۔ڈائریکٹر جنرل اربن اینڈ ریجنل پالیسی اینڈ اسٹریٹجک پلاننگ ڈاکٹر امتیاز بھٹی نے شرکاء کو آگاہ کیا کہ حکومت سندھ نے 17بڑے ثانوی شہروں، جن میں سکھر، لاڑکانہ، اور شہید بے نظیر آباد شامل ہیں، کے لیے جامع ترقیاتی ماسٹر پلان تیار کیے ہیں۔ مزید برآں 14 دیگر شہروں خیرپور، گھوٹکی، میرپور ماتھیلو، روہڑی، شکارپور، جیکب آباد، اور قمبر کے لیے ماسٹر پلانز پر کام جاری ہے ۔سیمینار میں ڈسٹرکٹ بار ایسوسی ایشن کے صدر منظور احمد پنہور، پیپلز لائر فورم کے محمد علی قریشی، میونسپل کمیٹی کے وائس چیئرمین عبدالکریم شیخ سمیت دیگر شرکاء نے اپنی آراء دیں۔فورم نے ماسٹر پلان میں شرکاء کی سفارشات شامل کرنے کا فیصلہ کیا اور کہا کہ مشاورتی عمل عملدرآمد تک جاری رہے گا۔ ماسٹر پلان کابینہ کو منظوری کے لیے پیش کیا جائے گا۔
