شعرو شاعری برصغیر کی پہچان رہی ہے ، ڈاکٹر فواد
کراچی(اسٹاف رپورٹر )چیئرمین گلشن اقبال ٹاؤن ڈاکٹر فواد احمد نے ساکنان شہر قائد کے منتظمین اور شعراء سے گلشن اقبال کے مرکزی دفتر میں ملاقات کی۔
اس موقع پر ساکنان شہر کے ناظم اعلی محمود خان اور ان کے ساتھیوں نے چیئرمین ڈاکٹر فواد احمد کا عالمی مشاعرہ کے انعقاد میں بلدیاتی سہولیات کی فراہمی و دیگر خدمات کو سراہتے ہوئے کہا کہ عالمی مشاعرے کے کامیاب انعقاد کیلئے ہمارے ساتھ جس طرح تعاون کیا گیا وہ بے مثال ہے ، ہمارے لیئے یہ بات باعث فخر ہے کہ ہمارے درمیان ایسی ادب دوست بلدیاتی قیادت موجود ہے جو کہ شہر کراچی میں ہونا بیحد ضروری ہے ، جس طرح گلشن اقبا ل کے چیئرمین اور ان کی پوری ٹیم ہمارے ساتھ آخرتک کو آرڈینیشن میں رہی، اس کیلئے ہم ان کے ہمیشہ مشکور و ممنون رہیں گے ۔چیئرمین ڈاکٹر فواد احمد نے اس موقع پر شرکاء سے بات چیت کرتے ہوئے کہا کہ ساکنان شہرکی جانب سے عالمی معاشرے کا انعقاد شہر کراچی کیلئے ایک خوش گوار جھونکا ہے ، شعرو شاعری ہمیشہ سے برصغیر کی پہچان رہی ہے اور اس خطے نے تاحال بڑے بڑے شعرائے کرام پیدا کئے ،اس طرح کے ایونٹ شہر کراچی میں ہوتے رہے تو وہ ادبی سرگرمیوں کو بام عروج پر پہنچانے میں اہم کردار ادا کریں گے جیسا کہ پہلے بھی ایسا ہوتا تھا جس میں کراچی کے حالات کی وجہ سے گیپ آنے لگا تھا ہم کوشش کررہے ہیں کہ ہمارے زیر انتظام اگر کوئی بھی ایسی سرگرمی ہو تو اس میں اپنا مثبت کردار ادا کیا جائے اور اسے بڑھایا جائے ، شہر کراچی کو ویسے بھی منفرد مقام حاصل ہے وہ ہر مثبت اور ادبی سرگرمی کیلئے دستیاب رہتا ہے ، اس موقع پر مہمانان گرامی کے اعزاز میں ظہرانے کا بھی انعقاد کیااور مہمانوں کو اجرک اور شیلڈ پیش کیں۔
