کیٹل فارم پرڈاکوؤں کا دھاوا،مویشی لوٹ کرفرار
کراچی(مانیٹرنگ ڈیسک)کیٹل فارم میں ڈکیتی کی بڑی واردات میں 10 سے زائد ڈاکو باڑے سے لاکھوں روپے مالیت کے مویشی لوٹ کر فرار ہوگئے ۔
تفصیلات کے مطابق عید قرباں کی آمد کے ساتھ ہی کراچی میں مویشی چھیننے کی وارداتیں بھی شروع ہو گئی ہیں۔کراچی میں کاٹھور کے قریب ڈاکوؤں نے کیٹل فارم پر دھاوا بول دیا اور 13 بیل اور بچھیا چھین کر فرار ہوگئے ۔کیٹل فارم انتظامیہ نے بتایا کہ رات 2 سے 4 کے درمیان 10سے زائدڈاکوؤں نے واردات کی، ڈاکوؤں کا گروہ ٹرک بھی ساتھ لایاہواتھا۔انتظامیہ کا کہنا تھا کہ چھینے گئے مویشی کی مالیت 30 سے 40 لاکھ روپے کے لگ بھگ ہے ۔پولیس کا کہنا ہے کہ واقعہ کی تحقیقات شروع کردیں اور مقدمہ درج کررہے ہیں۔یاد رہے گزشتہ ہفتے شہر قائد کے علاقے بھینس کالونی سے خریدے گئے مویشی ڈاکو لیاقت آباد کے قریب چھین کر فرار ہو گئے تھے ۔واقعے کی سی سی ٹی وی فوٹیج بھی سامنے آئی تھی اور پولیس نے ایف آئی آر بھی درج کر لی تھی ، جس میں کہا گیا ہے کہ متاثرہ شہری ٹرک میں 3 مویشی لاد کر اورنگی ٹاون کی جانب جا رہا تھا، جب راستے میں ڈاکوؤں نے اسلحے کے زور پر ڈرائیور کو ٹرک سے اتار کر اپنی کار میں سوار کیا۔مقدمے کے متن کے مطابق ڈاکو جانوروں سے بھرا ٹرک خود لے کر روانہ ہو گئے ، اور کچھ فاصلے پر جا کر ٹرک ڈرائیور کو اتار کر ڈاکو فرار ہو گئے ، پولیس حکام کا کہنا ہے کہ خالی ٹرک نیپا چورنگی کے قریب سے مل گیا ہے ۔
