بدترین لوڈشیڈنگ ،جماعت اسلامی کا قومی شاہراہ بند کرنیکا انتباہ
کراچی(اسٹاف رپورٹر)جماعت اسلامی ضلع ائر پورٹ کے تحت ملیر و شاہ فیصل کالونی میں بجلی کی 18,18گھنٹے کی لوڈشیڈنگ، اووربلنگ، بجلی کا بل ادا کرنے والوں کی بھی بجلی منقطع کرنے۔۔
اور ریکوری ٹیموں کے ذریعے مکینوں کو ہراساں کرنے کیخلاف آئی بی سی ملیرو شاہ فیصل کے باہر احتجاجی دھرنا چھٹے روز بھی جاری رہا۔دھرنے میں علاقے کے مردو خواتین نے بڑی تعداد میں شرکت کی اور کے الیکٹرک کے ظالمانہ رویے اور بدترین لوڈشیڈنگ و اووربلنگ کی مذمت کی۔ امیر جماعت اسلامی کراچی منعم ظفر خان نے شرکاء سے خطاب کرتے ہوئے کے الیکٹرک کی انتظامیہ اور حکومت کو متنبہ کیا کہ ملیر و شاہ فیصل کالونی کے عوام کے مسائل حل اور مطالبات منظور نہ کیے گئے تو نیشنل ہائی وے و دیگر شاہراہوں پر احتجاج اور اسے بلاک کرنے کا آپشن استعمال کیا جائے گا۔ جماعت اسلامی کراچی کے عوام کو تنہا نہیں چھوڑیگی، جماعت اسلامی عوام کی حمایت اور طاقت سے شہر میں بجلی و پانی سمیت دیگر مسائل کے حل اور اہل کراچی کے حق کیلئے احتجاج کا دائرہ وسیع کریگی ۔منعم ظفر نے مزید کہا کہ موجودہ اور ماضی کی تمام حکومتوں اور حکمران پارٹیوں کی سرپرستی اور حمایت کے باعث 20سال میں کے الیکٹرک ایک مافیا بن چکی ہے ، نیپرا بھی کے الیکٹرک کیلئے سہولت کار کا کردار ادا کرتی ہے ،یہ سندھ حکومت کی نا اہلی ہے کہ سی ای او کے الیکٹرک کوبلانے کے باوجود سندھ اسمبلی کی اسٹینڈنگ کمیٹی کے اجلاس میں شریک نہیں ہورہے ۔
