کے ایم سی کی سرکاری مراسلت کی کیو آر کوڈسے ڈیجیٹل توثیق
22دسمبرسے نافذ العمل،جعلی یا فراڈ مراسلت کے امکانات کا خاتمہ ممکن ہوگا نئے نظام پر بغیر کسی استثنا کے عملدرآمد یقینی بنایا جائے ، میئر کی افسران کو ہدایت
کراچی (اسٹاف رپورٹر)بلدیاتی نظام کو جدید خطوط پر استوار کرنے اور مکمل ڈیجیٹلائزیشن کی جانب تاریخی اقدام کے تحت بلدیہ عظمیٰ کراچی نے کیو آر کوڈ سے مزین محفوظ ڈیجیٹل مراسلت کے نظام کے آغاز کا اعلان کردیا ۔ یہ اہم اقدام سرکاری دستاویزات کی شفافیت، مستند حیثیت اور مؤثر عملدرآمد کو یقینی بنانے کیلئے متعارف کرایا جا رہا ہے جو 22 دسمبر 2025 سے نافذ العمل ہوگا۔نئے نظام کے تحت کے ایم سی کی جانب سے جاری کیے جانے والے تمام سرکاری خطوط، نوٹسز اور مراسلات پر ایک منفرد کیو آر کوڈ درج ہوگا جس کی تصدیق کوئی بھی فرد یا ادارہ کسی بھی مقام سے کر سکے گا۔ اس اقدام سے نہ صرف ادارے کے اندرونی امور میں بہتری آئے گی بلکہ شہریوں، اداروں اور دیگر اسٹیک ہولڈرز کو سرکاری دستاویزات کی فوری توثیق کی سہولت بھی حاصل ہوگی جس سے جعلی یا فراڈ مراسلت کے امکانات کا خاتمہ ممکن ہو سکے گا۔میئر بیرسٹر مرتضیٰ وہاب نے ڈیجیٹل نظام کے آغاز کے حوالے سے بتایا کہ کے ایم سی جدید، شفاف اور ٹیکنالوجی پر مبنی طرزِ حکمرانی کی جانب تیزی سے بڑھ رہی ہے ۔کیو آر کوڈ پر مبنی مراسلت کا نظام سرکاری لین دین کو محفوظ بنانے اور بلدیاتی دستاویزات پر عوامی اعتماد بحال کرنے کی جانب ایک اہم قدم ہے ۔میئر نے کہا کہ کے ایم سی محض بلدیاتی خدمات کی فراہمی تک محدود نہیں بلکہ قیمتی سرکاری اراضی، تفریحی مقامات، مارکیٹس، کچی آبادیاں اور دیگر اہم شعبوں کا بھی انتظام بھی سنبھالتی ہے ، سرکاری امور کو محفوظ بنانے ، غلط استعمال کی روک تھام اور جعلی سرگرمیوں کے خاتمے کیلئے ڈیجیٹل اور قابلِ تصدیق مراسلت کے نظام کا نفاذ وقت کی اہم ضرورت تھا ۔میئر نے تمام کے ایم سی افسران اور محکموں کو ہدایت کی کہ اس نئے نظام پر بغیر کسی استثنا کے سختی سے عملدرآمد یقینی بنایا جائے۔
