بعض اسکولوں نے محکمہ تعلیم کے احکامات نظرانداز کردیے
شدید سردی میں طلبا کو صبح 8 بجے سے قبل زبردستی اسکول بلایا جا رہا ہے
کراچی (این این آئی)سندھ میں بعض اسکولوں نے سردیوں میں محکمہ تعلیم کے 9 بجے اسکول کھولنے کے احکامات ہوا میں اڑا دیے ہیں۔شدید سردی میں طلبا کو صبح 8 بجے سے قبل زبردستی اسکول بلایا جا رہا ہے جبکہ تاخیر سے پہنچنے والے طلبہ کو اسکول میں داخل نہیں ہونے دیا جاتا ہے جس کی وجہ سے ان کی چھٹیاں ہو رہی ہے ۔ یاد رہے محکمہ اسکول ایجوکیشن سندھ سردی کے سبب اسکول صبح 9 بجے شروع کرنے کے فیصلہ میں توسیع کر دی تھی اور اعلان کیا تھا سردی کے پیش نظر اسکول 4 فروری تک صبح 9 کھلیں گے ۔فیصلہ کا اطلاق سرکاری و نجی اسکولز پر یکساں ہوگا جس کا باقاعدہ نوٹیفکیشن جاری کر دیا گیا تھا تاہم بیکن ہاؤس گروپ کے اسکولوں نے اس پر عمل نہیں کیا۔ بیکن ہاؤس کے ذمہ دار عارف جلیل سے متعدد بار رابطہ کیا گیا مگر انہوں نے جواب نہیں دیا۔ ایڈیشنل ڈائریکٹر پروفیسر رفیعہ ملاح نے بتایا کہ بیکن ہاؤس انتظامیہ سے بات ہوگئی ہے اور انہیں سختی سے ہدایت کی گئی ہے وہ نوٹیفکیشن کے مطابق اسکول کھولیں ورنہ ایکشن لیا جائے گا۔بیکن ہاؤس انتظامیہ نے بدھ سے اسکول 9 بجے کھولنے کی یقین دہانی کروائی ہے ۔
